Астанада жасанды интеллект тақырыбына арналған Technowomen Central Asia халықаралық форумы өтуде. Қазақстанның «TechnoWomen» КЕҰ басқарма төрағасы Әзиза Шөжеева kaz.inform.kz тілшісіне берген сұхбатында адамдар жұмыс орны үшін жасанды интеллектімен бәсекеге түскенін атап өтті.
«Біз жасанды интеллектінің өмірімізге, отбасымызға, бизнесімізге және еңбек нарығына қалай әсер ететінін әр қырынан қарастырғымыз келеді. Сондай-ақ, жасанды интеллектті күнделікті өмірде қалай қолдануға болады, мансапты қалай құруға болады, қандай стартаптар басымдық алады, қандай дағдыларды дамыту керек — барлық осы практикалық нәрселерді жастарымызға, әйелдерге, жалпы қоғамға өз өмірлерінде қолдануы үшін кеңінен таратқымыз келеді», — деді Ә. Шөжеева форум кулуарында.
Оның пікірінше, жасанды интеллекттің дамуы болашақта көптеген мамандықтардың өзгеруіне әкеледі.
«Мамандықтардың үш тобы бар. Біріншісі — ағаш ұстасы секілді физикалық еңбекпен байланысты. Бұл мамандық сақталуы мүмкін, бірақ кейбір жаңа құралдар көмегімен өзгеріске ұшырайды. Ғалым сияқты жоғары интеллектуалды жұмыс бар, олар да сақталады. Бірақ осы екі арадағы колл орталық операторы, контроллер, диктор сияқты мамандықтар қазірдің өзінде түрленді. Рентген деректерін қарап, диагноз қоятын рентгенолог-дәрігер мамандығына да диагнозды жақсырақ жасайтын жасанды интеллект жобалары келіп жатыр. Бірақ әлі де нормативтік-құқықтық база мен заңнама бұл жобаларды енгізуге дайын емес. Цифрлық заңнаманы дамытып, науқастарды емдеу хаттамаларына енгізе бастағанда ғана рентгенолог мамандығы өзгереді. Сонда ЖИ көмегімен жұмыс істейтін дәрігер біліктілігі болатын шығар», — деп санайды TechnoWomen төрағасы.
Оның айтуынша, жақында елде цифрлық құзыреті жоғары мамандарға қажеттілік екі есеге артады.
«Көптеген күнделікті жұмыстар автоматтандырылады. IT-кәсіпкерлікті немесе жасанды интеллектіні қолданатын мамандықтарды таңдау қажет. Бұл ретте бізде де сәтті жобалар бар — көз торын диагностикалау жобасын дамытатын отандасымыз бар. Сондай-ақ, біздің қыздар Каспийдің теңіз экожүйелерін тазарту бойынша ЖИ жобасын әзірлеуде. Мұндай жобалар қазірдің өзінде бар және бұл қуантады. TechnoWomen жаңа стартаптарға тәлімгерлік қолдау көрсетеді және жобаларды ілгерілету мәселелерінде көмектеседі», — дейді Ә. Шөжеева.
