Қазақстан экономикасы ілгерілеуі керек. Сонда ғана елдің әл-ауқаты түзеліп, жағдайы жақсарады, бұл анық.
Мемлекет басшысы жаңа сайланған депутаттардың алдында да экономиканы әртараптандыру, дамыту мәселесіне айрықша маңыз берді. Өйткені еліміздің өркендеуінің кепілі де осы.
Саяси жаңғыртулар қарқынды жүзеге асып, бір жүйеге келіңкірегеннен кейін әрине, экономикаға басымдық беретін кез келді. Энергетика министрлігі де осы бағытта экономиканы тұралатып алмау мәселесіне мән беріп, осы сәуір айында Қазақстандағы жанар-жағармай бағасы реттелетінін мәлім етті.
Ондағы басты мақсат – ұлттық мүддені қорғау, яғни, отандық мұнай өнімдерінің бағасының тым төмендігінен көршілес елдерге тасымалдануын шектеу. Мемлекет осы бағытта пәрменді шараларды қанша қабылдап отырғанымен, қазақстандық арзан өнімді сыртқа тасымалдаудың жолын тауып жатқандардың қарасы аз емес. Сондықтан өңделетін мұнай өнімдерінің бағасын реттеу аса қажет.
Ұлжалғас Әбілдахан
