ҚР Денсаулық сақтау министрі Ажар Ғиният Түркістан қалалық емханасында болып, үздік тәжірибе орталығының жұмысымен танысты, Түркістан қалалық емханасында енгізіліп жатқан жаңа бастамаларға ризашылығын білдірді. Атап айтқанда, алғашқы медициналық-санитарлық көмектің үздік практикалары орталығының адалдық алаңында орналасқан пациентерді қолдау және ішкі сараптама жүргізу орны, өз өзіне қызмет көрсету бұрышы, балалар патронажының әмбебап прогрессивті моделі әдістемесін қолдану, созылмалы аурулары бар пациенттерді жүргізу тәжірибесі, бірлестірілген дәрігерге дейінгі қызмет және қарау кабинеттері, отбасын жоспарлау, салауатты өмір салтын қалыптастыру,шұғыл жағдайлар кезінде көмек бойынша машықтау және әрі қарай аттестациялау кабинеті, психологтар және әлеуметтік қызметкерлердің жұмысын ұйымдастыруы, медициналық қызметкерлер арасында эммоциональді күйзеліс кезіндегі көмек орталықтарының жұмыс барысымен танысты.
Министр алғашқы медициналық-санитарлық көмектің үздік практикалары орталығы басқару жүйесін құруға, үздік жобаларды енгізуге және МСАК қызметтерінің сапасын арттыруға мүмкіндік беретіндігін айтты.
Сондай-ақ, емхана жұмысы барысымен танысу соңына қарай, Түркістан облысы медициналық ұйымдар басшыларымен кездесу өткізді.
Ажар Ғиният Денсаулық сақтау министрлігінің өңірлермен бірге жүргізіп жатқан жұмысы және Мемлекет басшысының денсаулық сақтау саласының алдына қойған міндеттерінің орындалу барысы туралы баяндады.
Денсаулық сақтау жүйесіндегі негізгі буын – алғашқы медициналық-санитариялық көмек, бұл халыққа көрсетілетін барлық медициналық көмекті үйлестіруге арналған қызмет. Түркістан облысында алғашқы медициналық-санитариялық көмектің 722 объектісі жұмыс істейді. 2021 жылы министрлік елдегі денсаулық сақтау объектілеріне түгендеу жүргізді. Республика бойынша 2025 жылға дейін 500 алғашқы медициналық-санитариялық көмек объектісін салу жоспарланып отыр. Биыл 4 фельдшерлік пункт, Ордабасы ауданында 3 объект, Төлеби ауданында 1 объект салынып жатыр.
Мемлекет басшысының тапсырмасына сәйкес алғашқы медициналық көмекті ұйымдастыру тәсілдерін түбегейлі қайта қарау үшін оны барынша мобильді және халықтың қалың тобына, оның ішінде ауыл тұрғындарына қолжетімділігін жақсарту жөніндегі іс-шаралар жоспары бекітілді.
Халықтың сұрауы бойынша амбу-латориялық жағдайда мамандан-дырылған медициналық көмек көрсету қағидалары бекітілді, осының негізінде Түркістан облысының халқы жалпы практика дәрігерінің жолдамасынсыз консультациялық-диагностикалық қызметтер ала алады. Сондай-ақ онкологиялық және гематологиялық ауруларға күдік болған кезде зерттеп-қарауды және емдеуді жеделдету үшін «Жасыл жол» қағидаты енгізілді, оның аясында онкологиялық ауруға күдікті пациенттерге 18 жұмыс күні ішінде консультация беріледі және зерттеп-қаралады.
Министрдің айтуынша, балаларды профилактикалық қарап-тексеру пакеттері кеңейтіледі. Сонымен қатар республикалық бюджет есебінен 16,4 млрд теңге мөлшерінде қаржыландыру көзделген және оған 9 сирек ауруы бар баланы емдеу үшін 24 дәрілік заттар сатып алынады.
Отандық денсаулық сақтаудың басым міндеттерінің бірі – ел халқын дәрі-дәрмекпен үздіксіз қамтамасыз ету. Осы мақсатта Бірыңғай дистрибьютор СҚ-Фармация амбулаториялық дәрімен қамтамасыз ету аясында 173 млрд теңгеден астам сомаға дәрілік заттарды сатып алды, бұл ретте өңірлерге сатып алынған дәрілік заттардың 45%-ы жеткізілді, ал стационар деңгейінде 165 млрд теңгеден астам сомаға дәрілік заттар сатып алды, бұл ретте сатып алынған көлемнен өңірлерге 39%-ы жеткізілді.
«Түркістан облысында амбулаториялық дәрімен қамтамасыз ету аясында 11,6 млрд теңгеден астам сомаға дәрілік заттар сатып алу жүзеге асырылды, стационарлық көмек аясында 10 млрд теңгеден астам сомаға дәрілік заттар сатып алынды», – дейді министр.
«Өткен жылы министрлік халық денсаулығын сақтаудың барлық бағыттары бойынша маңызды жұмыс жүргізді. Қол жеткізген жетістіктермен қатар тез арада шешуді талап ететін міндеттер де бар. Біз ел халқына медициналық көмектің сапасы мен қолжетімділігін арттыруға ықпал ететін тиімді шешімдерді әзірлеу үшін кәсіби және азаматтық қоғамдастықтың бүкіл күш-жігерін біріктіруіміз қажет», – дейді Денсаулық сақтау министрі Ажар Ғиният.
