Сенаттың Әлеуметтік-мәдени даму және ғылым комитетінде Мемлекет басшысының «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын іске асыру аясында денсаулық сақтауды цифрландыру және медициналық сақтандыруды дамытуға арналған кеңейтілген отырыс болды. Бұл туралы ҚР Парламенті Сенатының баспасөз қызметі хабарлады.
«Цифрландыру – бұл технологияны енгізу ғана емес, бұл Қазақстанның барлық азаматтарына арналған медициналық көмек сапасын жақсартудағы маңызды қадам. Біз медициналық жүйелердің ықпалдастығын қамтамасыз етуге, әрбір азамат уақтылы және сапалы медициналық көмек ала алатындай қызметкерлердің цифрлық сауаттылығын арттыру мен дербес деректерді қорғауды күшейтуге тиіспіз. Алайда, бұл үдерістерді тиімді жүзеге асыру үшін көптеген кедергілерді жою және сапалы әрі тиімді шешімдер қабылдау қажет. Инновациялық технология мен ақпараттық жүйелерді енгізу, жүйелерді кіріктіру, сақтандыру мәдениетін қалыптастыру шаралары еліміздің денсаулық сақтау жүйесін жаңа деңгейге шығаруға мүмкіндік береді», – деді Нұртөре Жүсіп.
Отырыс барысында міндетті әлеуметтік медициналық сақтандыру жүйесін дамыту, медициналық ақпарат жүйелерін кіріктіру және цифрлық тұғырнамалар арқылы медициналық қызметтердің қолжетімділігін арттыру сияқты негізгі мәселелер талқыланды.
Емделушілердің деректерін сақтау, түрлі медициналық жүйелерді біріктіру және медицина қызметкерлерін цифрлық дағдыға үйрету мәселелеріне ерекше назар аударылды. Сондай-ақ әлеуметтік осал топтарға медициналық қызметтерге қолжетімділікті кеңейту шаралары талқыланды.
Отырысқа сондай-ақ салалық Министрліктердің өкілдері, сарапшылар мен жергілікті денсаулық сақтау органдарының басшылары қатысты. Талқылау нәтижесінде денсаулық сақтау және МӘМС жүйесін жақсартуға бағытталған ұсыныстарды іске асыруға орай жұмысты жалғастыру туралы шешім қабылданды.
