Халықтың сенімін арқалаған әр депутат өңірдің дамуына ықпал етеді. Себебі жергілікті биліктің басты құрылымдарын, тексеру комиссиялары мен бюджетін бекітетін де мәслихат депутаттары.
Елорда төрінде өткен республикалық форумда «AMANAT» партиясының Төрағасы Қошанов Ерлан Жақанұлы аманаттық депутаттар әкімдіктермен өзара тиімді қарым-қатынас жасауы тиіс екенін, себебі сайлауалды уәделерді орындау осыған қатысты екенін ерекше атап өтті. Түркістан облысының мәслихат депутаты ретінде елімізде тұңғыш рет өткізілген маңызды басқосуға менде қатыстым. Бұл игі іс мемлекет пен қоғамдағы басты мәселелерді талқылауға, олардың шешімдерін қарастыруға мүмкіндік берді. Себебі, 11 панельдік сессияға қатысқан 2,5 мың депутат және «AMANAT» мүшелері жалпы міндеттер мен алдағы жұмыс бағыттарын талқылап қана қоймай, министрлермен орталық мемлекеттік органның басшысына тікелей сұрақтарын қоюға мүмкіндік алды. Расында, елдің сеніміне ие болып, халықтың алдында уәдесін берген азаматтар әділ шешім мен адал қызметтің жауапкершілігін сезінуде. Сондай-ақ, жергілікті билікпен қатар өңірлердегі тұрғындардың өмір сапасына арттыруға депутаттарда жауапты екендерін анық жеткізе білді.
«Әділет пен адалдық – ажырамас ұғымдар. Ал осы ұғымдардың салтанат құруы үшін қоғамдық сана мен әлеуметтік құндылықтар өзгеруі керек. Сонда ғана көздеген мақсатымызға жетеміз. Халықтың сенімі бізге күш береді». Партия Төрағасының форумдағы бұл сөзі Мемлекет басшысының әділетті Қазақстан құрудағы басты бағыттарымен үндесіп отыр. Ал, ҚР Премьер-министрі Әлихан Смайылов Мемлекет басшысының Сайлауалды тұғырнамасын және «AMANAT» партиясының бағдарламасын іске асыру Үкімет жұмысының негізі екенін атап өтті. Яғни, партияның бағдарламалық құжаттарын тиімді іске асыру халықтың өмір сүру деңгейін арттыруға мүмкіндік береді деген сөз. Бүгінде, депутаттардың басты мақсаттарға қол жеткізуіне, әр өңірлердің дамыуна ықпал етуге қажетті ресурстардың барлығы бар. Ендеше, халыққа берген уәдені орындауда, қойылған міндеттерді жүзеге асыруда мәслихат депутаттары әрқашан белсенділік таныта бермек.
Ғани РАЙЫМБЕКОВ
Түркістан облыстық мәслихат депутаты
