VII шақырылымда сайланған Парламент Мәжілісі мерзімінен бұрын таратылып, мәслихаттардың өкілеттігі тоқтатылғаны белгілі. Енді 19 наурызда Парламент Мәжілісі депутаттарының кезектен тыс сайлауы өтеді.
Бұған дейінгі мәжіліс пен мәслихаттағы әріптестерім халықтың сенімін ақтап, көптің көңілінен шығу үшін еңбегін сіңірді деп ойлаймын. Алдағы сайлауда да билік пен халық арасында нағыз алтынкөпірлік қызметін адал атқарар халық қалаулылары келеді деген сенімдемін.
Бұл сайлауда біршама тың өзгерістер бары анық. Әйелдер, жастар және ерекше мұқтаждығы бар адамдар үшін қарастырылған 30 пайыздық квота партиялық тізім мен мандаттардың бөлінісі кезінде сақталмақ. Мәжілістің жаңа құрамында Қазақстан халқы Ассамблеясының квотасы болмайды. Сондай-ақ, алғаш рет Мәжіліс пен мәслихаттар сайлауында «бәріне қарсымын» деген баған еніп отыр.
Мәжіліс депутаттарының 70 пайызы партиялық тізім арқылы, ал қалған 30 пайызы бір мандатты округтерден сайланады. Сонымен қатар, облыстар мен республикалық маңызы бар қалалардағы мәслихат депутаттары да аралас жүйе бойынша сайланбақ. Депутаттардың 50 пайызы бір мандаттық жүйе арқылы, 50 пайызы партиялық тізім бойынша өтетін болады. Ал, аудан және облыстық маңызы бар қалалардағы мәслихат сайлауында азаматтар бір мандатты округтерден шыққан кандидаттарға дауыс береді.
Мұның барлығы шынайы ашық бәсекелестік болу үшін, жаңа саяси тұлғалар шығу мақсатында енгізілген талаптар һәм жаңа ережелер. Елдің сөзін сөйлеп, халықтың жоғын жоқтап, атқарушы билікке мәселені ашық әрі анық жеткізе алатын халық қалаулылары көптің қолдауына ие болмақ. Алдағы сайлауға көпшілік белсене қатысып, нағыз жұрт жанашырын таңдауына тілектеспін.
Нұралы ДӘУЛЕТИЯРОВ,
Түркістан облыстық мәслихатының VII шақырылымдағы депутаты
