Түркістан қаласындағы №12 Қаныш Сәтпаев атындағы жалпы орта мектебінде «Дін саласындағы заңнама және оған енгізілетін түзетулер» тақырыбында жиын өтті. Аталған отырысқа Түркістан облыстық діни басқармасының басшылық құрамы, қаламыздағы мешіт имамдары, Түркістан қалалық зерттеу және талдау орталығының өкілдері мен дінтанушылар мен оқушылар және ұстаздар қауымы қатысты.
Кездесу барысында жиналғандар діни қызмет және діни бірлестіктер туралы заңнамада азаматтардың құқықтарына кепілдік беретін және қорғайтын, екінші жағынан дінді экстремистік және басқа да деструктивті мақсатта қолдану мүмкіндігін төмендетуге бағытталған құқықтық нормалар туралы баса айтты.
Ал, дінтанушылар заң жобасына енгізілетін жаңашылдықтарға тоқталды. Олардың сөзінше, заң жобасында шетелде діни білім алу, қоғамдық орындарда адамның-бет бейнесін тұмшалайтын киім түрлерін киюді шектеу, дін қызметіне мемлекеттік қызметкерлердің қатысуы, дін жоралғылары бойынша некені қиғызуға қатысты жаңа нормалар қабылданатын болады.
Бұдан бөлек, заң жобасы аясында БАҚ-та жарнамаланатын және таратылатын деструктивтік идеологиялық ағымдардың киім түрлерін киюге шектеу қою көзделгені айтылды. Бұл өз кезегінде кәмелеттік жасына толмаған жасөспірімдердің заңсыз діни ағымдарға тартуға қатысты жауапкершілікті күшейтеді.
Отырыс барысында қатысушылар дін мәселелері бойынша заңнамалық актілерге ензілетін түзетулердің маңыздылығына да тоқталды. Олардың айтуынша, заң жобасы діни экстремизм идеологияларының тарап кетуінің алдын-алу бойынша жалпы мемлекеттік жүйені қалыптасыру және мемлекеттің зайырлы қағидаттарын күшейтуге негіз бола алады.
Естеріңізге сала кетейік, аталған Заң жобасының толық нұсқасы ҚР Дін істері және азаматтық қоғам министрлігінің ресми сайтында және «Электронды Үкімет» порталында жарияланған.
