Кәсіпкер өз кәсібіне адал болып, еңбеккерлерін тірлікке дұрыс жұмылдыра білсе, ісі берекелі болары айдан анық. Түркістанда танымал кәсіпкер Сабыр Атаев олай етпей отыр. Айлықты әкімдік бөлмей отыр деген уәжбен жұмысшыларды наразылыққа итермелеген Атаевтың өзі сыңайлы.
Сонымен, 1500-ден астам жұмысшы айлығын ала алмай отырмыз деп, ашынған күйі митингке шықты…
Түркістан жеріндегі бірнеше маңызды нысандардың құрылысын жүргізген жүзден астам жұмысшылар 4 айдан бері жалақысын алмағанын алға тартып, наразылық білдірді. Облыс және облыс орталығының басшылары мәселенің ақ-қарасын айыру үшін арнайы тексеріс жүргізді.
Расында, “Ақжол” ЖШС жұмысшыларына 4 айдан бері еңбекақысын төлемегені анықталды. Аталған дерек бойынша, Түркістан қаласының әкімі Нұрбол Тұрашбеков баспасөз мәслихатын өткізіп, БАҚ өкілдеріне мәселенің мән-жайын баяндады. Жиынға Түркістанның бас прокуроры Жаннұр Ахметбек те қатысты.
Анықталғанындай, «Ақжол» ЖШС 2017 жылдан бері қосалқы мердігер ретінде қала аумағындағы бірнеше құрылыс жұмыстарына қатысқан. 2021 жылы ХҚТУ тас жолынан «Отырар» шағынауданына баратын жолдың күрделі жөндеуін бастаған. Алайда , бұл нысанға қатысты қазіргі кезде сот процесі жүріп жатыр. Осыған байланысты қала әкімдігі тарапынан қаржы аударылмаған. Төлемдер сот шешіміне сәйкес жүргізіледі.
Көтеріліп отырған мәселеде «Ақжол» ЖШС бас мердігер емес, қосалқы мердігер ретінде жұмыстар жүргізген. Алдағы уақытта серіктестік атқарған жұмыстары бойынша бас мердігерге толыққанды мәлімет беруі міндетті. Талап орындалған жағдайда тиісті соманың барлығы төленеді” – деді қала әкімі брифинг барысында.
Шынтуайтына келгенде, құрамында бір емес, он екі кәсіпорны бар ірі корпорация басшысы, белгілі кәсіпкердің 4 айдан бері жалақы бере алмауы қисынсыз. Тас, асфальт, темір бетон, кірпіш шығаратын зауыттар мен наубайхана және аграрлық секторды меңгеріп отырған бизнесменнің өзіне бұл әрекеті жақсы ат, абырой әпермесі рас. Оның үстіне, жалған қарекетке еңбеккерлерін итермелеуі – оңбастың тірлігі болды.
“Аptamedia.kz-ақпарат”
