Қоғамның басты сұраныстарының бірі – адам өмірі мен денсаулығына қолайлы орта қалыптастыру, табиғатқа ұқыпты қарауды іргелі қағидат ретінде орнықтыру мәселері алғаш мәрте конституциялық деңгейде бекітілді. Ұлт келешегін айқындаған стратегиялық құжаттың озық нормалары бүгін «AMANAT» партиясы Түркістан облыстық филиалы жанындағы Экологиялық кеңестің жұмыс жиынында айтылды. Экологиялық қауіпсіздікті мемлекеттің стратегиялық басымдығы ретінде қарастырған Конституцияның жаңа құқықтық талаптары табиғатты қорғау ісін жүйелі жаңғыртуға серпін беретініне назар аударылды.
Кеңес отырысының ашылуында сөз алған «AMANAT» партиясы Түркістан облыстық филиалының төрағасы, облыстық мәслихаттағы фракция жетекшісі Алтынсары Үмбетәлиев халықтың қолдауымен қабылданған Ата заң бүгінгі заман талаптарына толықтай жауап беретінін айтты.
«- Мемлекет басшысы Қасым-Жомарт Кемелұлы Тоқаев Конституцияны қуатты, күшті, бәсекеге қабілетті Қазақстанның жаңа Жарғысы деп атады. Біртұтас Қазақстан халқы өзінің Ата заңын келешек ұрпақ алдындағы жауапкершілігін терең сезіне отырып қабылдағанын мәлімдеді. Экологиялық құндылықтарды сақтау мен табиғатты қорғау мәселесі жаңа Конституцияда ерекше маңызға ие құқықтық норма болып енді. Негізгі заңда әр азаматтың қолайлы қоршаған ортада өмір сүруге құқығы бекітіліп, табиғатты қорғау – мемлекет пен қоғамның ортақ міндеті ретінде қарастырылып отыр. Жер мен табиғи ресурстар мәселесі кез келген мемлекеттің стратегиялық дамуына тікелей әсер ететін маңызды факторлардың бірі саналады. Әсіресе, Қазақстан Республикасы сияқты табиғи ресурстарға бай елдер үшін бұл тақырып экономикалық қана емес, әлеуметтік тұрақтылық пен ұлттық қауіпсіздік тұрғысынан да өзекті. Жер мен табиғи ресурстарды халық меншігі ретінде тану – стратегиялық әрі саяси тұрғыдан маңызды қадам деп айтуымызға толық негіз бар», – деді жаңа Конституциядағы экология тақырыбына жан-жақты тоқталған Алтынсары Дүйсенбекұлы.
Жұмыс жиынында сөз алған кеңес төрағасы, Түркістан облыстық мәслихатының депутаты Бегімбет Байғараев, біз барлығымыз бір елдің азаматтары ретінде табиғатты қорғау, тазалықты сақтау және болашақ ұрпаққа көркейген, жасыл Қазақстанды аманат ету жолында біріге әрекет етуіміз керек екеніне тоқталды. Қазақстандықтардың басым бөлігінің қолдауымен қабылданған жаңа Конституция осы бағыттағы бастамалардың құқықтық негізін нығайтып, қоғамның тұрақты дамуына жол ашатынын атап өтті.
Қазақстан тарихының жылнамасында әр кезеңнің өз жүгі мен жауапкершілігі бар екенін, жаңа Конституцияның қабылдануы елімізді заман талабына сай дамытуға үлкен мүмкіндік ашқанын облыстық партия филиалы төрағасының орынбасары, Түркістан облыстық мәслихатының депутаты Қалыйма Жантөреева айтты. Осы жолда Мемлекет басшысының «Әділетті Қазақстан» концепциясы мемлекеттік басқарудың жаңа философиясын түзгенін айта отырып, жаңа Конституцияның басты маңызы билік тармақтары арасындағы тепе-теңдікті сақтау, «Халық үніне құлақ асатын мемлекет» тұжырымдамасын конституциялық деңгейде бекіту екенін жеткізді.
Халықтың қолдауымен өмірге келген жаңа Конституциямыз адам құқықтары мен бостандықтарын қорғау мәселесіне ерекше мән бергенін Түркістан облыстық мәслихатының депутаты Саидирасулхан Ералиев айтып өтті. Жалпыхалықтық референдумға азаматтардың жоғары деңгейде қатысуы мен жаңа Конституция жобасына кең қолдау білдіруі – еліміздегі қоғамдық-саяси белсенділіктің артқанын және халықтың ел тағдырына жауапкершілікпен қарайтынын көрсетті деп мәлімдеді. Осы орайда, референдум барысында қол жеткізілген жоғары көрсеткіштерді Жалпыұлттық коалиция жүргізген ауқымды әрі жүйелі жұмыстардың нәтижесі деп бағалады.
Жаңа Конституция аясында айтылған сарапшылық пікірлерді талқылау қорытындыланғаннан кейін, Экологиялық кеңестің жұмыс жиыны «AMANAT» партиясы бекіткен Сайлауалды бағдарламаның орындалу барысын қараумен жалғасты. Күн тәртібіне сәйкес, кешенді жоспар аясында өңірдегі экологиялық жағдайды жақсарту жөніндегі шаралар талқыланып, Түркістан облыстық табиғи ресурстар және табиғат пайдалануды реттеу басқармасының басшысы Ғалымжан Төлепов пен Кентау қаласы әкімінің орынбасары Болысбек Шәріпбековтың хабарламалары тыңдалды.
Сала жетекшілерінің есептерінде облыс аумағында және Кентау қаласының шеңберінде қоршаған ортаны қорғау, табиғи ресурстарды тиімді пайдалану және экологиялық тепе-теңдікті сақтау бағытында атқарылып жатқан жұмыстар қамтылды. Әсіресе, елді мекендерді көгалдандыру жұмыстарын күшейту, жасыл аймақтарды ұлғайту, ағаш отырғызу көлемін арттыру мәселелері басты басымдықтардың бірі ретінде атап өтілді. Бұл бағыттағы жұмыстар өңірдің экологиялық ахуалын жақсартумен қатар, тұрғындардың өмір сапасын арттыруға да оң әсерін тигізетіні айтылды.
Сонымен қатар, қатты тұрмыстық қалдықтар полигондарын санитарлық талаптарға сәйкестендіру, қалдықтарды сұрыптау және қайта өңдеу жүйесін жетілдіру мәселелері де кеңінен сөз болды. Бұл ретте заманауи технологияларды енгізу, экологиялық қауіпсіздікті сақтау және қоршаған ортаға келетін зиянды азайту бағытында нақты шараларды күшейту қажеттігі атап өтілді.
Жиын барысында кеңес мүшелері экологиялық мәселелердің маңыздылығын ескере отырып, жауапты сала жетекшілеріне кешенді жоспардағы міндеттерді сапалы әрі уақытылы орындауды жүктеді. Сондай-ақ тұрмыстық қалдықтарды қайта өңдеу, Боралдай су қоймасы салынатын аумақтағы 171 гектар орман қоры жерінің нысаналы мақсатын өзгертуге келісім алу мәселелері бойынша сауалдарын қойды. Қоғамда тазалық сақтау мәдениетінің жаппай үрдіс алуына ықпал ету, қасиетті, киелі орындар аумақтарына ағаш отырғызу жұмыстарын жүргізу жөнінде ұсыныстарын білдіріп, жер қойнауын пайдаланушы компаниялардың жасыл желек қорын ұлғайтуға үлестерін саралауды жүктеді. Кентау қаласының әкімдігіне қала аумағындағы көпқабатты тұрғын үйлердің аулаларында ағаш көшеттерін жаңартуды тапсырды.
Жалпы, кеңес отырысында қаралған мәселелер жаңа Конституцияда айқындалған қоршаған ортаны қорғау және азаматтардың қауіпсіз әрі қолайлы өмір сүру ортасын қамтамасыз ету қағидаттарымен сабақтас екені атап өтіліп, бұл бағыттағы жұмыстар алдағы уақытта партия бақылауында болады.
«AMANAT» партиясы Түркістан облыстық филиалының баспасөз қызметі
