Мемлекет басшысы Қасым-Жомарт Тоқаев 2021 жылдың 1 қыркүйектегі «Халық бірлігі және жүйелі реформалар – ел өркендеуінің негізі» атты Қазақстан халқына Жолдауында дамыған заманда бәсекеге қабілеттіліктің негізгі факторларының бірі – толыққанды цифрландыру екенін айтқан болатын. Қазақстан үшін заманауи цифрлық технологияларды ендіру аса маңызды.
«Қазіргі заманда бәсекеге қабілеттіліктің басты факторының бірі – барынша цифрландыру. Қазақстан үшін заманауи цифрлық технологиялар трансферті, Индустрия 4.0 элементтерін енгізу айрықша маңызды. Біз шетелдегі стратегиялық серіктестерімізбен белсенді жұмыс істеуге тиіспіз. Отандық ІТ секторды дамытып, күшейте түсу де маңызды. Елімізге жас, білімді мамандар керек. Цифрландыру жөніндегі ұлттық жобаның аясында кемінде 100 мың жоғары білікті ІТ маман даярлау қажет. Цифрлық саладағы қызметтер мен тауарлардың экспорты 2025 жылға қарай кемінде 500 миллион долларға жетуге тиіс», – деген еді Президент.
Мәселен, еліміздің бас қаласында жолақысын электронды төлеу және диспетчерлеу жүйесін жаңғырту шеңберінде аялдамаларды цифрландыру жұмыстары басталды.
Нақты атағанда енді аялдамаларда QR коды бар арнайы жапсырмалар орналастырылады. Оларды сканерлеу арқылы бағдарлардың нақты келу уақытын көруге болады.
Ол үшін «Avtobys» мобильді қосымшасын Google Play, App Store немесе AppGallery-ден жүктеп алу қажет. Қолданбаның басты бетінде QR белгісін басып, аялдамадағы QR кодты сканерлегеннен кейін қосымшада аялдамадан өтетін маршруттар және олардың болжамды келу уақыты көрсетіледі.
Қазіргі уақытта QR кодтары бар жапсырмалар 225 аялдамаға орнатылған. QR коды бар сызбаларды орналастыру бойынша жұмыстар жалғасады.
Жалпы, жоспар бойынша елімізде жасанды интеллект саласында жыл сайын 1000 маман дарялануы керек. Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды.
