Алдағы уақытта қазақстандық пойыз жолаушыларына Starlink интернеті қолжетімді болады.
«Жолаушылар тасымалы» АҚ басқарма төрағасы Жәнібек Тайжановтың айтуынша, Starlink интернетін пилоттық жоба ретінде іске қосу жоспарланып отыр.
«Тиісті өтінім берілді, енді Цифрлық даму, инновациялар және аэроғарыш өнеркәсібі министрлігінің растауын күтіп отырмыз. Жыл соңына қарай пилоттық режимде іске қосамыз деп ойлаймын», — деді Жәнібек Тайжанов аталған ведомствода өткен баспасөз мәслихатында.
Сондай-ақ, «Жолаушылар тасымалы» АҚ басшысы 2024 жылдың екінші жартысында «Тальго» пойыздарында бейнебақылау орнатылатынын тілге тиек етті.
«Жолаушылар тасымалы» АҚ басқарма төрағасы Жәнібек Тайжановтың айтуынша Қазақстанда әйелдерге арналған пойыздарға сұраныс артып келеді.
«Біз «Әйелдер вагоны» жобасын одан әрі дамыту бойынша әлеуметтік сауалнама жүргіздік. Оған 600-ден астам респондент қатысты. Әлеуметтік сауалнама қорытындысы бойынша әйелдер вагондарын тағы үш бағытта іске қосу туралы шешім қабылданды», – деді Жәнібек Тайжанов ведомствода өткен брифингіде.
Жаңадан іске қосылатын «Әйелдер вагоны» пойыздары «Астанадан Семейге, Ақтөбеден Алматыға және Алматыдан Шымкентке қатынайды.
«2024 жылдың бірінші тоқсанында 70 мыңнан астам жолаушы «әйелдерге арналған вагондар» қызметін пайдаланды. Бұл көрсеткіш 2023 жылмен салыстырғанда 2 есе артқанын көрсетіп отыр. Әйелдерге арналған вагондарда жеті жасқа дейінгі ер балалардың жүруіне рұқсат», – дейді ол.
Еске сала кетейік, бүгінде әйелдерге арналған 8 пойыз маршруты бар:
– №77/78 «Алматы-Маңғыстау»;
– №351/352 «Алматы – Өскемен»;
– №45/46 «Павлодар-Түркістан»;
– №37/38 «Маңғыстау-Семей»;
– №47/48 «Атырау-Астана»;
– №33/34 «Ақтөбе – Алматы-1»;
– №4/3 «Астана-Алматы-2»;
– №71/72 «Астана-Шымкент».
