Түркістан жоғары көпсалалы, қолөнер колледжінде «Есірткі және синтетикалық есірткіге жол жоқ» тақырыбында кездесу өтті. Шараны Түркістан облысы полиция департаментінінің есірткі қылмысына қарсы іс-қимыл басқармасының қызметкерлері ұйымдастырды. Кездесуге колледждің студент жастары, оқытушылар, Түркістан қалалық емханасының дәрігер наркологтары қатысты.
Кездесуде Түркістан облысы полиция департаментінінің есірткі қылмысына қарсы іс-қимыл басқармасының қызметкерлері нашақорлық және есірткінің заңсыз айналымы – ұлттық қауіпсіздікке төнетін негізгі қауіп екеніне тоқталды. Олардың айтуынша, БҰҰ-ның есірткі және қылмыс басқармасының 2021 жылғы баяндамасына сәйкес Қазақстан есірткіден болатын өлім бойынша әлемде 34-орында тұр екен. Тіпті БҰҰ Қазақстандағы нашақорлар саны ресми есепте тұрғандардан 7 есе көп болуы мүмкін екенін айтады.
Ал Ішкі істер органдарының ресми медиа орталығына қарасты «Polisia.kz» дерегіне жүгенсек, 2021 жылы ІІМ синтетикалық есірткінің заңсыз айналымына қатысты 1400-ден аса қылмыс тіркеген. 142 келіден астам синтетикалық есірткі тәркіленіп, 17 есірткі лабораториясы жойылған.
Кездесу барысында студент жастарға мамандар Қазақстан есірткі саудасымен күресте көршілес Қытай, Өзбекстан, Қырғызстан және Ресей сияқты мемлекеттермен және халықаралық қауымдастықпен тізе қосып әрекет етіп жатқанын айтты. Өйткені, есірткі саудасын тоқтату немесе азайтуға бір ғана мемлекеттің әлеуеті жетпейтіні анық.
