Бүгінде технология мен жасанды интеллект біздің өмірімізде шешуші рөл атқарады, яғни жаңа дәуірге қадам бастық. Еліміз қазірдің өзінде қызметтерді 100% цифрландырудың алдында тұр. Қазақстанның жаһандық мақсаты – аймақтағы ең ірі цифрлық хабтардың біріне айналу.
Осыған дейін тұрғын үй мен нысандарды газдандыру азаматтардың біраз уақытын алып, машақаты көп күрделі процедуралардан өтуді талап ететін. Техникалық шарттарға өтінім беру мен мердігерлерді іздеудің ыңғайлы жолы болмай, газдандыру туралы ақпараттың шектеулігінен көгілдір отынға ауысу ісінде қиындық туды.
Бүгіндері газдың цифрландыру тәсіліне көшуі аталған салаға оң үрдіс әкелгендей.
Осы ретте «ҚазТрансГаз Аймақ» АҚ азаматтарға қолайлы жағдай жасап, цифрлық технологияларды енгізуді жалғастырып келеді. Сонымен, былтырдан бері «QazaqGaz» ҰК» АҚ еншілес компаниясы «ҚазТрансГаз Аймақ» АҚ-да газдандыру үшін техникалық шарттарды (ТШ) беру процестері жетілдіріліп, автоматтандырылған еді. Техникалық шарттарды алу – тұрғын үйді газдандырудың алғашқы қадамы.
Бұдан былай тұрғындар өз үйлерінен шықпай-ақ электронды цифрлық қолтаңбаны (ЭЦҚ) қолданып, eGov.kz порталы арқылы газдандыру үшін техникалық шарттарды алуға өтінім бере алады. Ол үшін eGov.kz порталында жеке тіркеуден өту, байланыс телефонын және электронды поштаны көрсету, тұрғылықты және газдандыру нысанының мекенжайын таңдау, техникалық құжаттың скан көшірмесін қоса тіркеу, газдандыру нысаны жөніндегі деректерді көрсету, ЭЦҚ көмегімен өтінімге қол қою және техникалық шарттардың берілетіні немесе берілмейтіні туралы аталған ұйымның жауабын күту керек.
Техникалық шарттарды қарау және беру процесі 5 жұмыс күні аралығында, ал техникалық жағынан күрделі нысандарға 10 жұмыс күні аралығында іске асырылады.
