Өткен жылғы статистикалық деректердің қорытындылары Қазақстанның инновациялық даму саласындағы оң өзгерістерін айқындады.
Инновациялық өнім көлемінің 2021 жылғы 1,4 трлн теңгеден 2022 жылы 1,9 трлн теңгеге дейін ұлғаюы байқалады. Сондай-ақ Жаһандық инновациялық индекстің халықаралық рейтингінде біздің ел екі позицияға – 83-тен 81-ге дейін көтерілді.
Сондай-ақ инновациялық гранттар аясында жобалар мен стартаптарға жан-жақты қолдау көрсетіледі. Барлық конкурстың қорытындысы бойынша 34 өтінім мақұлданды, оның ішінде жалпы сомасы шамамен 2 млрд теңгеге жететін 31 өтінім бойынша шарттар жасалды. Гранттар сомасы 1 млрд 198 млн теңгені, жеке сектор тарапынан қоса қаржыландыру 924 млн теңгені құрады. 2023 жылы өңірлерде бизнес-инкубаторларды дамыту бағдарламасы іске асырылды. Осылайша, 10 сәуір мен 12 мамыр аралығында «Qazinnovations» АҚ бизнес-инкубацияны қолдау бойынша өтінімдерді қабылдады, ұсынылған 37 өтінімнің 21-і мақұлданды.
Цифрлық даму, инновациялар және аэроғарыш өнеркәсібі министрлігінің мәліметінше, министрлік байланыс қызметтерінің сапасын үнемі қадағалап, жетілдіріп отырады. Өткен жылы ауылдық елді мекендерде интернет сапасын жақсарту бойынша қарқынды жұмыстар жүргізілді, бүкіл ел бойынша 251 ауылға интернет желісі қосылды, 1463 ауылда интернет сапасын жақсарту жұмыстары атқарылды. Бұл жүргізілген жұмыс көрсеткішінің 14,4 пайызға артқанын көрсетеді. Жоспарға сәйкес 2027 жылға қарай тағы 250 ауылдық елді мекенді интернетпен қамту көзделіп отыр. Өткен жылы 176 ауыл KazSat интернет спутнигіне қосылған. Қанатқақты режімде Starlink арқылы 10 мектеп интернетпен қамтамасыз етілді. 2024 жылы 2000 мектепті қамту жоспарда бар. Өткен жылы 3000 базалық станса орнатылды. Бүкіл ел аумағы бойынша 723 5G базалық станса іске қосылған.
Министр байланыс операторларына қатысты айыппұлдарға тоқталды. Оның айтуынша, айыппұлдардың ұлғаюы операторлардың нұсқаманы сақтауының 33 пайыздан 65 пайызға өсуіне әсер етті. 2023 жылы 3 млрд 18 млн теңгеге айыппұл салынды және жоспардан тыс 763 тексеру жүргізілді.
«Қолжетімді интернет» ұлттық жобасы 2024-2027 жылдар аралығында іске асырылады. Жоба аясында халық пен бизнесті жоғары жылдамдықты интернетпен қамтамасыз ету жоспарланып отыр. 2027 жылы тұрғын үй желілері кеңжолақты интернетпен 100 пайызға дейін қамтылады деген болжам бар.
