Қазақстан Республикасы Мәдениет және ақпарат министрлігінің бастамасымен, Қазақстан Республикасы Мәдениет және ақпарат министрлігі және демеуші Қазақстан Халық банкі АҚ қолдауымен жүзеге асырылып жатқан «ХАЛЫҚ ӘУЕНІ» концерттік-гастрольдік жобасы бүгін Түркістан облысында ресми түрде бастау алды.
21 мамыр – Мәдениет және өнер қызметкерлерінің кәсіби мерекесі күні аталған жоба еліміздің 17 өңірінде бір уақытта салтанатты түрде іске қосылды.
Бүгін Түркістан облысы, Отырар ауданы, Шәуілдір ауылында жобаның шымылдығы түріліп, алғашқы концерттік кеш көрермен назарына ұсынылды. Аталған мәдени жоба аясында Қазақстанның халық әртісі Алтынбек Қоразбаев, Қазақстанның еңбек сіңірген қайраткерлері Нұрболат Арзамасұлы, Ардақ Балажанова және Қазақконцерт мемлекеттік академиялық концерттік ұйымының әртіс-солистері мен «Бірлік» би ансамблінің өнерпаздары ұлттық ән, би және эстрадалық өнердің үздік үлгілерін жоғары деңгейде паш етуде.
Гастрольдік сапар Түркістан облысында үш күнге жоспарланған. Келесі концерттік бағдарламалар төмендегі кестеге сәйкес өтеді:
— 22 мамыр – Арыс қаласы
— 23 мамыр – Ордабасы ауданы, Темірлан ауылы
Айта кетейік, «Халық әуені» жобасы ұлттық мәдениетті кеңінен насихаттап, өңір тұрғындарын кәсіби сахналық өнердің үздік үлгілерімен таныстыруға және мәдени байланысты нығайтуға бағытталған.
