Президент Жолдауында инфрақұрылым құру және энергетикалық қауіпсіздік мәселесін де шешу қажеттігі айтылған болатын. Қолдан келгенше өз ресурстарымызға арқа сүйеген абзал екені ескертілді.
Бұл орайда, электр желісімен Түркістан облысындағы елді мекендердің 98 пайызы қамтылған. Өткен жылы 71 нысанның құрылысына бюджеттен 10,7 млрд теңге бөлінді. Нысандар пайдалануға тапсырылғаннан кейін 55 мың тұрғын сапалы электр қуатымен қамтылды. Облыста қажетті электр қуатының 80 пайызы сыртқы көздерден тасымалданады.
Осы орайда электр қуатының тапшылығын «Самұрық-Қазына» қорымен бірлесіп, бу-газ қондырғы стансасын салу арқылы шешу жоспарланып отыр. Стансаның қуаттылығы 1 мың МВт-ты құрайды. Нысан үшін жер учаскесі белгіленген. Құрылыс мерзімі 2024-2026 жылдарға есептелген, 2 мыңнан аса жұмыс орны ашылады. Жобаны іске асыру нәтижесінде облыстың электр қуат тапшылығы шешілмек.
Сондай-ақ Түркістан облысында соңғы 5 жылда тұрғын үй саласы бойынша құрылыс қарқыны артқаны белгілі. Алайда өзекті мәселелер де аз емес. Үйлерді уақтылы тапсырмау, абаттандыру жұмыстарын талапқа сай жүргізбеу және өзге де түйткілдері бар. Бұл ретте, облыс әкімі Дархан Сатыбалдының төрағалығымен аппарат отырысында тұрғын үй саласындағы жұмыстар тұрақты түрде сараланып, кемшіліктер талқыланады.
Облыстық құрылыс басқармасының мәліметінше, өткен жылы өңірде барлық қаржыландыру көздері есебінен 866,4 мың шаршы метр тұрғын үйді пайдалануға беру міндеті қойылған. Түркістан қаласындағы әкімшілік-іскерлік орталығындағы 62 тұрғын үйдің тапсырыс берушісі – облыстық құрылыс басқармасы. Өткен жылы 55 тұрғын үйдің құрылысын аяқтап, жалпы 185 мың шаршы метрді құрайтын 3 140 пәтерді пайдалануға тапсыру жоспарланған болатын. 2023 жылдың 10 айында 1 409 пәтер немесе 81 188 мың шаршы метр үй пайдалануға берілген. Құрылысты мерзімінен кешіктірген мердігерлерден келісімшартқа сәйкес 2,5 млн теңге өндірілген.
