Өткен жылы Еуропа Одағы мен Қытай Халық Республикасы арасындағы сауда айналымы 1 триллион еуродан асып түсті. Бұл әлемдегі ең ауқымды сауда серіктестігі деуге әбден негіз бар.
Мамандардың айтуынша, теңіз жолының жалғыз кемшілігі – Қытайдан Еуропаға тауар жеткізу үшін 45 тәулік уақыт кетеді. Егер сол тауар құрлықпен, яғни Қазақстан аумағынан теміржол және автокөлік жолдары арқылы тасымалданса, 15 тәулікте діттеген жеріне жетер еді. Ол үшін еліміздің көлік-логистика кешені әлемдік стандарттарға сай болуы тиіс.
Осынау әлеуетті ескерген ҚР Президенті Қасым-Жомарт Тоқаев былтыр Қазақстанның көлік-транзит жүйесін дамыту жөнінде арнайы кеңес өткізген болатын. Мемлекет басшысы теміржол мен автомобиль жолының инфрақұрылымын дамыту – өркендеудің басым бағыты екенін атап өтті. Бұл ретте Транскаспий халықаралық көлік бағыты Қазақстанның транзиттік әлеуетін толық пайдалануға мүмкіндік беретін тың бағыт болатыны сөзсіз.
– Қасым-Жомарт Кемелұлының қазіргідей әлемдегі геосаяси жағдай шиеленісіп тұрған уақытта мұнай тасымалын әртараптандыру және көлік-логистика кешенін дамыту мәселесіне назар аударғаны өте құптарлық қадам. Теміржолдың әлеуетін арттыру, оның мүмкіндігін барынша пайдалану маңызды. Әсіресе, қолданыстағы транзиттік бағыттарды дамыту және жаңаларын құру, логистикалық инфрақұрылымды жаңғырту басты назарда болуы тиіс деп ойлаймын. Мәселен, алысқа бармай- ақ, Түркістан облысындағы Сарыағаш стансасына назар аударайық. Қазір бұл станса толық қуаттылығымен жұмыс істеп тұр. Соның өзінде эшелон-эшелон тауарлар кезек күтіп тұрып қалады. Осыған орай Дарбаза–Мақтаарал теміржол желісі салынбақ. Бұл Мақтаарал және Жетісай аудандарын мемлекетаралық теміржол торабына қосуға мүмкіндік береді, – деді М.Тынышпаев атындағы Қазақ көлік және коммуникациялар академиясы көлік колледжінің арнайы пән оқытушысы Қанатбек Керімбаев.
