Елімізде көлік нөмірінің цифрлары мен әріптерін таңдауға мүмкіндік беретін қызмет түрі енгізілуі мүмкін. Бұл туралы Цифрлық даму, инновациялар және аэроғарыш өнеркәсібі министрі әлеуметтік желідегі жеке парақшасында жария еткен болатын.
«Алматыда Мамандандырылған халыққа қызмет көрсету орталығына бардым. Ішкі істер министрлігімен бірлесе жоғары сұранысқа ие автокөлік нөмірлерін сату қызметін енгізу бойынша ауқымды жұмыс атқарылуда. Қазіргі уақытта қазақстандықтар мұндай мемлекеттік нөмірлерге электронды үкімет порталы және eGov Mobile мобильдік қосымшасы арқылы тапсырыс бере алады. Өткен жылы отандастарымыз шамамен 6 млрд теңгеге VIP-нөмірлерді сатып алған. 2023 жылы 3 млрд теңгеге 8 мыңнан астам нөмір берілген. Маған басқа да арналар арқылы қажетті нөмірлерге тапсырыс беруге болатындығы туралы ақпарат келіп жатады. Бұл жағдаймен барынша таныспын. Сондықтан біз мемлекеттік нөмірлерді таңдауға бағытталған қызметті енгізу мәселесін пысықтап жатырмыз», – деген еді министр өз сөзінде.
Министрдің айтуынша, көлікке нөмірді таңдау қызметінің арқасында әріп белгілерін де өз бетінше белгілеуге мүмкіндік болады. Сәйкесінше, осындай нөмірлерді сату арқылы бюджетке қосымша қаражат түспек.
Мұндай функцияның көмегімен клиент кез келген әріптік нөмір белгілерін таңдай алады. Мысал ретінде алсақ, сатып алушы өз есімінің алғашқы үш әрпін енгізу арқылы қалаған нөміріне қол жеткізе алады. Бұл қызмет түріне бізде үлкен сұраныс бар.
Бүгінгі таңда мұндай қызметті жүзеге асыру үшін жоғары сұранысқа ие нөмірлердің тізбесін ұлғайтуды заңнамалық түрде бекітуіміз қажет. Осындай нөмірлерді сату арқылы бюджетке қосымша қаражат түспек.
Бүгінде еліміздің IT саласында 16 мыңға жуық компания жұмыс істейді. Осы салада еңбек ететіндер саны 182 мың адамға жетті.
