Кейінгі 5 жылда Түркістан облысында 4 420 отбасы коммуналдық баспанаға ие болған. Орталық коммуникациялар қызметінде өткен брифингіде аймақ басшысы Дархан Сатыбалды осындай дерек айтты.
«Түркістан өңірінде құрылыс саласы қарқынды дамып келеді. 5 жылда көлемі құрылыс көлемі 2,5 есе өсіп, 351 млрд теңгені құрады. Пайдалануға тапсырылған тұрғын үй алаңы 2 есе көбейіп, 864 мың шаршы метрге жетті. 5 жылда 4 420 отбасы коммуналдық баспанамен қамтылды. «7-20-25» бағдарламасы және «Отбасы банк» арқылы 5000-нан астам отбасы әлеуметтік-ипотекалық үй сатып алды», – деді ол.
Сондай-ақ, әкім өңірдегі 2 000-нан астам отбасы жалға алған баспана ақысына субсидия алғанын атап өтті.
«221 көппәтерлі үйге күрделі жөндеу жүргізілді. Түркістан облысында биыл 205 мың шаршы метр үй тапсырылды. Жыл соңына дейін жалпы алаңы 211 мың шаршы болатын метр 65 көпқабатты үйді тапсыру жоспарлануда. Нәтижесінде 3557 отбасы өз баспанасына қол жеткізеді», – деді Дархан Сатыбалды.
