Бүгін, Келес ауданы әкімдігінің мәжіліс залында Түркістан облыстық Қазақстан халқы Ассамблеясы жанындағы Келес аудандық Ақсақалдар кеңесінің 2025 жылдың ІІ тоқсандық отырысы ұйымдастырылды.
Отырыстың басты мақсаты – қоғамдық келісім мен татулықты нығайту, ел ішіндегі бірлікті сақтау жолдарын талқылау, жастар тәрбиесі мен этносаралық қарым-қатынастар жайын ортаға салу.
Жиынға Келес ауданы әкімінің орынбасары Сариев Дәурен Нұрланұлы, аудандық Ақсақалдар кеңесінің төрағасы мен мүшелері, аудандық Аналар кеңесінің төрайымы мен мүшелері, этномәдени бірлестіктердің төрағалары мен белсенді өкілдері, Келес ауданы ішкі саясат, мәдениет, тілдерді дамыту және спорт бөлімінің бас маманы Оразымбетова Феруза, №8 Т.Бегманова атындағы жалпы білім беретін мектеп директорының оқу-тәрбие ісі жөніндегі орынбасары Мұстафаева Камила, Қошқарата ауылдық округінің әкімі Нұрмахан Ерлан Қалмаханұлы, сондай-ақ Келес және Сарыағаш аудандарының қорғаныс істері жөніндегі біріктірілген бөлімінің бастығы, подполковник Шахирбаев Бекзат Кеңесұлы, «Қоғамдық келісім» КММ-нің Келес аудандық филиалының мамандары қатысты.
Отырысты Келес аудандық Ақсақалдар кеңесінің төрағасы Нұртаев Лесбек Ағылұлы жүргізіп, ашық әрі мазмұнды диалог орнатуға үндеді. Күн тәртібінде төмендегідей мәселелер қаралды:
- Мемлекет басшысының баяндамасын түсіндіру
Жиында алғаш болып сөз алған №8 Т.Бегманова атындағы мектептің оқу-тәрбие ісі жөніндегі орынбасары Мұстафаева Камила, Қазақстан халқы Ассамблеясының XXXIV сессиясында Мемлекет басшысы Қасым-Жомарт Тоқаевтың «Бірлік пен келісім жолындағы 30 жыл» тақырыбындағы баяндамасына тоқталып, ондағы негізгі бағыттарды кеңінен талдап берді. Ол өз сөзінде елдегі бейбітшілік пен этносаралық келісімнің маңызын, біртұтас ұлт болудың негіздерін айта келіп, жастарды отансүйгіштікке тәрбиелеуде ақсақалдардың рөлі ерекше екенін атап өтті.
- Әлеуметтік ахуал мен этносаралық ынтымақтастық мәселесі
Қошқарата ауылдық округінің әкімі Нұрмахан Ерлан Қалмаханұлы округке қарасты 1-Мамыр елді мекеніндегі этностар тығыз орналасқан аймақтың әлеуметтік жағдайы туралы баяндама жасады. Оның айтуынша, бұл елді мекенде түрлі ұлт өкілдері тату-тәтті өмір сүріп, бір шаңырақ астында ынтымақ пен бірлік үлгісін көрсетіп отыр. Ауылдағы инфрақұрылым мен әлеуметтік қызметтердің қолжетімділігі, жастардың белсенділігі және жергілікті тұрғындар арасындағы бірлік туралы кеңінен мағлұмат берілді.
- Әскерге шақыру жұмыстарының орындалуы
Келес және Сарыағаш аудандарының қорғаныс істері жөніндегі біріктірілген бөлімінің бастығы, подполковник Шахирбаев Бекзат Кеңесұлы көктемгі әскерге шақыру науқанының барысы туралы мәлімет берді. Ол өз баяндамасында Келес ауданы бойынша шақыру жоспарының орындалуын, жас сарбаздардың әскери қызметке дайындығын және патриоттық тәрбиенің маңызын атап өтті.
Күн тәртібінде көтерілген мәселелер бойынша қатысушылар баяндамашыларға сұрақтарын қойып, өз ұсыныс-пікірлерін ортаға салды. Ақсақалдар кеңесінің мүшелері жастар тәрбиесі, отбасылық құндылықтар, ұлттық рух пен тарихи сананы қалыптастыру жайында маңызды ойлар айтты.
Жиынды қорытындылаған Келес аудандық Ақсақалдар кеңесінің төрағасы Лесбек Нұртаев:
«Бүгінгі отырыс – өскелең ұрпақтың болашағына бей-жай қарамайтын, елдің бірлігі мен тұтастығын нығайтуды көздеген азаматтардың ортақ алаңы. Ақсақалдар кеңесінің басты мақсаты – жастарды елжандылыққа тәрбиелеу, құқық бұзушылықтың алдын алу және қоғамда оң өзгерістерге жол ашу. Елдің бірлігі – біздің ең үлкен байлығымыз. Сондықтан осы бағытта барлығымыз бірлесе жүйелі жұмыс жүргізуіміз керек», – деді.
Түркістан – ежелден түрлі ұлт пен ұлыстың мекені. Бұл өңірде ұлтаралық келісім мен дінаралық татулыққа негізделген өмір сүру салты қалыптасқан. Соңғы жылдары облыста қоғамдық келісім мен бірлік бағытында бірқатар іргелі жұмыстар атқарылып келеді.Этномәдени бірлестіктермен тығыз байланыс: Облыстағы этномәдени орталықтармен тұрақты кездесулер ұйымдастырылып, мәдени іс-шаралар өткізіледі. Қоғамдық келісім кеңестері: Әрбір ауданда ақсақалдар, аналар және ардагерлер кеңестері арқылы қоғамдық мәселелер шешімін тауып келеді. Жастармен жұмыс: Жастардың мәдени және азаматтық белсенділігін арттыру, этностар арасында достықты нығайту мақсатында форумдар мен семинарлар өткізіледі. Тіл саясаты: Мемлекеттік тілді меңгеру мен өзге ұлт өкілдерінің қазақ мәдениетіне жақындасуына қолайлы жағдай жасалуда. Тәрбиелік жұмыстар: Мектептер мен ЖОО-да ұлтаралық достық пен патриоттық тәрбиеге арналған арнайы бағдарламалар енгізілген. Осы бағыттағы жұмыстарды жүйелі жалғастыру арқылы Түркістан өңірі еліміздегі ұлтаралық татулықтың үлгісін көрсетіп келеді. Келес аудандық Ақсақалдар кеңесінің бүгінгі отырысы да осы ізгі мақсаттарды жүзеге асыруға арналған тағы бір маңызды қадам болды.
