Келес ауданында аса қауіпті марокко шегірткесіне қарсы күрес жүйелі түрде жалғасуда. Зиянкестің таралуын дер кезінде тоқтату мақсатында арнайы АН-2 ұшақтары арқылы әуеден химиялық өңдеу жұмыстары қарқынды жүргізілуде. Бұл әдіс шегірткелер тығыз шоғырланған аумақтарды қысқа мерзім ішінде толық қамтуға мүмкіндік береді. Қазіргі таңда дернәсілдердің шамамен 65 пайызы төртінші жас кезеңіне өтіп, аса қауіпті сатыға жеткен. Осыған байланысты әуе арқылы өңдеу жұмыстары күшейтілген.
Атқарылған жұмыстар барысында 5 760 гектар жер әуе техникасының көмегімен дәріленді. Әсіресе Бірлік, Жамбыл, Бозай елді мекендері маңындағы шегіртке көп таралған алқаптарда ұшақтардың жұмысы ауа температурасына сәйкес нақты жоспарланып, тиімді жүзеге асырылуда. Жалпы, Келес ауданында 159 мың гектардан астам жер зерттеліп, оның ішінде 93 мың гектардан аса аумаққа химиялық өңдеу жүргізілді. Ауқымды шараларға барлығы 117 техника жұмылдырылып отыр. Жүргізіліп жатқан кешенді жұмыстар зиянкестердің таралуын шектеуге және ауыл шаруашылығы дақылдарын сақтап қалуға бағытталған.
