Мемлекет басшысы Қасым-Жомарт Тоқаев биылғы халыққа арнаған жолдауында балық шаруашылығына ерекше мән беру керектігін айтқан еді. Президент тапсырмасына сәйкес Келестік шаруалар енді балық шаруашылығын дамытуды қол алмақ. Жалпы өңірде егіншілік пен қатар мал шаруашылығы қарқынды екені анық. Алайда ағынды суға бай аумақ болғандықтан балық шаруашылығы келестік диқандарға таңсық дүние емес. Бүгінде ауданға қарасты Ақтөбе ауылдық округіндегі балық шаруашылығы дамып келеді. Айта өтсек Лесбек батыр елді мекенінің аумағындағы Келес өзенінің бұрынғы арнасына арнайы бассейндерді құрған «Тамсан БТА» өндірістік кооперативі 300 мыңға жуық балық өсіруде. Кәсіпкердің жұмысымен арнайы танысқан Келес ауданының әкімі Жәнібек Ағыбаев балық шаруашылығын дамытуға мемлекеттік көмек көрсетуді шегелеп айтты. Қазіргі таңда аталған өндірістік кооперативте 40 жұмыскер тіркеліп, барлығы балық өсіруге ниеттеніп отыр. Оларға «Ауыл аманаты» бағдарламасы аясында аз пайызбен несие беру бағытында шаралар атқарылуда. Аудан әкімі тиісті бөлім басшысына өндірістік кооператив мүшелерімен бірге ірі балық шаруашылығымен айналысатын кәсіпкерлердің басын қосып, тәжірибе алмасу семинарларын өткізуді және мемлекет тарапынан көрсетілетін көмектерді рәсімдеу бойынша жұмыс атқаруды тапсырды. Бүгінде шаруалар балықтың үш түрін өсіріп жатқан болса, алдағы уақытта басқа да түрлерін өсіруді қолға алмақ.
Аудан әкімі Ақтөбе ауылдық округіндегі елді мекендерді аралап, қажетті тапсырмаларды жүктеді. Ескіқорған елді мекеніндегі шекара кеден бекетінің маңын абаттандыру, елді мекендерге ағын су жеткізу, тазалық мәселесі жөнінде жұмыс жоспары бекітіліп, орындалуы бақылауға қойылды. Соңғы кездері түйіткілді мәселеге айналған Жаңадәуір ауылындағы мәдениет үйінің бүгінгі жағдаймен танысып, жөндеу жұмыстарын жүргізуді атап өтті.
Сонымен қатар, Ынтымақ елді мекеніндегі ауыл тұрғындарын сапалы ауыз сумен қамтуды және ағын суды қажетті деңгейде жеткізу бойынша жауаптыларға нақты тапсырмаларды жүктеді.
Осыған дейін аудан басшысы Жәнібек Ағыбаев бірқатар елді мекендерді аралап, тұрмыс тіршілігімен танысқан болатын. Келес ауданының әкімі Жәнібек Ағыбаев аудан аумағындағы қордаланған мәселелерді шешу мақсатында көптеген жобалар қолға алынған. Аудан басшысы аудан әкімінің орынбасарлары және дербес бөлім басшыларымен бірге Ошақты ауылдық округінің елді мекендерін аралады.
Алдымен Ошақты елді мекеніндегі №46 Абай атындағы жалпы орта мектепке қосымша 300 орындық оқу корпусы, асхана, спорт зал құрылысымен танысқан аудан әкімі жұмыстың барысын сынға алды. Құрылыс жұмыстарын ширатуға, құрылысты сапалы атқаруға тапсырма берді. Тиісті бөлім басшысына бақылауды күшейтуді айтты.
Аудан әкімі Қоңыртөбе елді мекенінің тұсындағы каналдың жағдайымен танысып, өткір бұрышқа соқтығысып, жар пайда етіп жатқан аймақты реттеу бойынша қажетті шараларды атқаруға тапсырма берді. Сонымен қатар апатты жағдайдағы көпірлердің жайын көріп, шұғыл шара қабылдап, мәселені шешуді айтты.
Үйіне баратын жолға тас төсеп беруін сұраған тұрғынның мәселесін көріп, жоспарлы жұмыстардың қатарына қосты. Сондай-ақ ағын су мәселесінде уақыт күттірмейтін мәселелерді шешу бағытында тапсырмалар жүктеді.
Бақышсай, Атақоныс және Жиделі елді мекендерінде болған аудан әкімі ауылдардың өзекті мәселелеріне зерделеу жүргізді. Көгалдандыру бағытында атқарылған жұмыстарды қатаң сынап, жергілікті климатқа ыңғайлы көшеттерді отырғызуды тапсырды. Сонымен қатар Жәнібек Ағыбаев дербес бөлім басшыларымен бірге микроавтобустарға мініп ауданға қарасты елді мекендерді аралады. Шалғайда шағын орналасқан ауылдардың мәселелерін көзбен көріп, шешу жолын жергілікті тұрғындардың қатысуымен талқылады. Аудан әкімі бастаған бөлім басшылары алдымен Біртілек ауылдық округінің орталығында болып, ондағы қордаланған мәселелермен танысты. Жергілікті әкімдіктің мамандарымен пікір алмасып, тұрғындармен қарым-қатынас, мәселерді шешу бағытындағы ойларын тыңдады. Жергілікті тұрғындардың тұрмысын жақсартуға арналған 10 жоба дайындап, ұсынуын тапсырды.
— Мемлекеттік қызметшінің басты мақсаты тұрғындарға сапалы қызмет жасау, сонымен қатар жергілікті халықтың тұрмысын жақсарту бойынша өз ұсыныстарын жасақтау болып табылады. Жаңа жұмыс орындарын ашу бағытында нақты жобаларды әзірлеуде сіздердің бастамаларыңыз маңызды рөл атқарады. Күнім өтсе, айлығым жүрсе деген ойдан арылуымыз қажет. Президентіміз, облыс басшысы біз жергілікті атқарушы органның өкілдеріне осы бағытта жұмыс жүргізуді тапсырып отыр. Нақты межеге бірлессек жетеміз. Сол кезде атқарған жұмыстарымыз нәтиже көрсетіп, көптің ықыласын аламыз,-деді Жәнібек Есенұлы.
Тұрғындар сұранысы негізінде биыл Біртілек елді мекенінде 300 орындық жаңа мектептің құрылысы басталмақ. Аталған білім нысаны «Жайлы мектеп» бағдарламасы негізінде жүзеге аспақ. Сонымен қатар мәдениет нысанының құрылысы жүргізілуі жоспарлануда. Онда көптеген үйірмелер шоғырланып, ауыл оқушыларына қызмет көрсетпек. Аудан басшысы орталық елді мекеннің инфрақұрылым жүйелерін жаңарту, тозығы жеткен көшелерді орта жөндеуден өткізу, әлеуметтік нысандар орналасқан көшелерге түнгі жарық шамдары мен аяқ жолдар салу бойынша тиісті тапсырмаларды жүктеді. Аудан аумағын аралау сапары Алпамыс батыр, Ұшқын және Қошқарата ауылдық округтерінде жалғасып, елді мекендердің өзекті мәселелерімен танысты. Ауылдарды дамытудың жоспары түзіліп, тиісті шешімдер қабылданды.
Сонымен қатар ауылдарды газбен қамтуға арналған бірқатар жобалар іске асырылып келеді. Келес ауданында қуаты 30 мың кубты құрайтын газ тарату станция пайдалануға берілмек. Аталған нысан Біртілек ауылдық округінің аумағында орналасып, биылғы жылдың қысқы жылу маусымы басталар тұста іске қосылмақ.
Нәтижесінде Абай ауылы, Ошақты және Ұшқын ауылдық округінің елді мекендерін толықтай табиғи газбен қамтуға мүмкіндік туады. Түркістан облысының әкімі Дархан Сатыбалды Келес ауданындағы қордаланған мәселелерді шешуге арналған жиында аталған нысанды тездетіп іске қосуды тапсырып, орындалуын бақылауына алған болатын. Берілген тапсырманың орындалу деңгейін бақылау мақсатында бүгін Келес ауданының әкімі Жәнібек Ағыбаев газ тарату станциясында болып, атқарылып жатқан жұмыстардың барысын бақылап, жұмысты ширату бағытында тапсырмаларды жүктеді. Айта кетейік, Келес ауданының елді мекендеріне табиғи газ босататын «Түркістан облысы, Келес ауданы, Абай АГТС құрылысы (қуатын күшейту)» нысаны бойынша құрылыс монтаж жұмыстарын жүргізуге 2019 жылы әлеуетті өнім беруші мердігер мекеме «Газ KZ» ЖШС-і жұмыстарды жүргізуге келісім шарт түзіліп, құрылыс монтаж жұмыстары басталған. Қазіргі таңда нысанды пайдаланушы мекеме «Интергаз Орталық Азия» АҚ-ы теңгеріміге өткізу бағытында жұмыстар атқарылуда. Айта кетейік келестік тұрғындар жан-жақты адамдар саналады. Олай дейтініміз ерте егін ең алғаш осы ауданнан экспортталады. Жуықта ғана келестік тұрғын Маулен Сытыбаев электрлі шөп қырқатын машина ойлап тапты. Бүгінде мектеп қызметкері Маулен Сытыбаев №27 Н.Тілендиев атындағы жалпы орта мектебінде 20 жылдан бері кіші қызметкер болып жұмыс істейді. Мектеп қызметкері өз қолымен шөп оратын электрлік шөп оратын машина құрастырды. Мектеп ауласы кең болғандықтан, мұндай техникаға деген қажеттілік бары анық. Ауыл тұрғынының бұл өнертабысқа деген сұранысы артуда екен.
— Мұндай машинаны жасауға бір күн ғана уақыт кетеді. Ол үшін ескі коляска, қарапайым насостың электромоторы және қолара болса жеткілікті. Бұл менің жасап шығарған бесінші машинам. Ауыл тұрғындары 5000-10000 теңгеге сатып алып та жатады. Жалпы тұрмыстық жағдайда қолдануға ыңғайлы, — дейді Маулен Абдурахманұлы.
Осыған дейін аудан басшысы Келестің архитектуралық қалпын бірегей стильге ауыстыру мәселесін көтерген болатын.
Келес ауданының архитектуралық келбеті бірегей стильге көшпек. Енді аудан көшелерін жарықтандыру, көгалдандыру, ғимараттардың қасбеті мен жол жабындары біркелкі болады. Бұл туралы Келес ауданының әкімі Жәнібек Ағыбаевтың төрағалығымен өткен мәжілісте айтылды. Аудан басшысы осы бағытта ауыл әкімдеріне нақты тапсырмалар жүктеді. Аудан әкімі ауыл, ауылдық округінің әкімдеріне берілген тапсырмалардың орындалуы бойынша баяндамаларын тыңдады.
— Әр ауыл әкімі жыл соңына дейін атқаратын жұмыстарының жоспарын ұсыну керек. Өз ұсыныстарына сәйкес график жасап, оны бақылауды қолға аламыз. Әкімдердің ұсынысында ауылдардың сыртқы қасбеттерін бірдейлендіру, абаттандыру саласына қатысты мәселелер көзделуі керек,- деді Жәнібек Есенұлы.
Мәжілістің күн тәртібінде аудан аумағын көгалдандыру және санитарлық-тазалық жұмыстарының барысы туралы мәселе қаралды. Аудан әкімі тарапынан берілген тапсырмалардың орындалу деңгейі сараланып, кемшіліктер бойынша ескерту берілді. Сонымен қатар, аудандағы саяси-ахуал жағдайы талқыланып, тиісті дербес бөлім мен ауыл әкімдеріне нақты тапсырмалар жүктелді.
Жиын барысында Келес ауданында «Ауыл аманаты» пилоттық жобасы бойынша атқарылған жұмыстар жайында ауданның кәсіпкерлік және ауылшаруашылығы бөлімінің басшысы Мадияр Әшірбаев тыңдалды. Қошқарата және Ошақты ауылдық округтерінде «Ауыл аманаты» бағдарламасына қатысуға ауыл тұрғындарын біріктірген бес кооператив жиналады. Олардың ішінде 95 адамның құжаты толық заңдастырылып, 81 адамның құжаты аудандағы «Ырыс» МКҰ» ЖШС – нің өкіліне тапсырылды. Аудан әкімі бекітілген жоспарды орындауда жұмысты ширатуға және тездетуге тапсырмаларды жүктеді.
