Мемлекет басшысы өскелең ұрпаққа жол ашу үшін барлық жағдайды жасау қажеттігін айта келе, Барыс жылын “Балалар жылы” деп жариялаған болатын. Сонымен қатар, 1959 жылғы қараша айының 20-ы күні Ассамблея Бала құқықтары жөніндегі декларацияны және 1989 жылы дәл осы күні Балалар құқықтары туралы конвенцияны қабылдады. Осыған байланысты 1990 жылдан бастап бұл тарихи сәт Дүниежүзілік балалар күні болып белгіленді.
Елімізде өтіп жатқан Қазақстан Республикасы Президентінің кезектен тыс сайлауы күнімен тұспа-тұс келген атаулы дата барысында келестік ата-аналар өз бүлдіршіндерімен ел Президентін сайлауға келуде. Соның бірі Келес ауданына қарасты Ақтөбе ауылдық округінің тұрғыны Ақниет Жарқынбек алты айлық сәбиін өзі тіркелген №363 сайлау учаскесіне ерте келді. Бүлдіршінге сайлау науқанына орай демеушілер тарапынан ұйымдастырылған арнайы сыйлық табысталып, еліміздің болашағына баланған сәбиге ізгі-тілектер айтылып, өз баталарын берді.
Айта кетейік, Келес ауданы бойынша 145 948 азамат тұратын болса, соның 71 363 сайлауға қатысуға мүмкіндігі бар. Оларға қызмет көрсету үшін ауданда 58 сайлау учаскесі құрылып, бүгін өз жұмысын жасауда. Ал аудан бойынша бір жасқа дейінгі 2 760 сәби тіркелген.
