Бүгін Түркістан облысы қоғамдық даму басқармасы “Қоғамдық келісім” КММ-нің жұмыс жоспарына сәйкес, Келес және Сарыағаш аудандарында ҚХА құрылымдары төрағаларымен кездесулер өтті.
Жиынға “Қоғамдық келісім” КММ-нің басшысы Эльмира Жанғазиева, аудандардағы ҚХА жанындағы Ақсақалдар, Аналар кеңестерінің төрағалары және этномәдени бірлестіктердің жетекшілері, қоғамдық пікір көшбасшылары қатысты.
Кездесуде этносаралық бірлікті сақтау, бірегейлік қағидатын ұстану, елдің дамуы жолындағы әр азаматтың рөлі және қалыптасқан тату тірлікті жалғастыру секілді тақырыптар кеңінен қозғалып, жарасымды әңгіме өрбіді.
Жиында сөз алған Эльмира Ұласбекқызы этносаралық татулықтың қоғамдағы рөлі өте маңызды екенін баса айтты. Осы орайда, басқосуда жыл басынан бері атқарылған жұмыстар сараланды және алдағы жоспарлар талқыланып, Қазақстан халқы Ассамблеясының даму тұжырымдамасы, ҚХА-ның 30 жылдығын ұйымдастыру және өткізу жөніндегі жоспары мен Ассамблеяның қоғамдық жобаларын іске асыру мәселелері қаралды.
Кездесуде аудандық ҚХА жанындағы Ақсақалдар кеңесінің төрағалары мен этнос өкілдері сөз сөйлеп, халықтың береке-бірлігін арттыруға, жастардың тәрбиесіне бағытталып атқарылып жатқан жұмыстарды атап өтті.
Жиынға қатысушылар ел бірлігін нығайтуға қатысты ойларын ортаға салып, пікір алмасты.
