Бұл туралы бүгін «AMANAT» партиясының партиялық алаңында БАҚ өкілдерімен есеп беру кездесуінде Сайрам аудандық мәслихатының төрағасы Шамхат Қалмурадов айтты.
Мемлекет басшысы Қасым-Жомарт Тоқаев Қазақстан халқы Ассамблеясының ХХХІV сессиясында еліміздің рухани және тарихи-мәдени ордасы – Түркістанда ашылған жаңа «Достық үйін» үлгі еткен болатын.
Осындай «Достық үйлерін» еліміздегі бірнеше қала мен аудандарда ашуды тапсырған еді. Оның ішінде Сайрам ауданы да бар. Бұл ретте, облыс әкімі Нұралхан Көшеров этнос өкілдері тығыз шоғырланған Сарыағаш, Сайрам аудандарынан «Достық үйін» ашу керектігін айтып, аталған аудан әкімдіктеріне осы тапсырмаға сәйкес қысқа мерзім ішінде нақты ұсыныс енгізуді тапсырған еді.
– Президент тапсырмасына сәйкес, Сайрам ауданының орталығында жаңа «Достық үйінің» жер телімі нақтыланып, жобалық-сметалық құжаттары әзірленуде. Жоспарға сәйкес, «Достық үйінің» құрылысы келесі жылы көктемде басталмақ. Бұдан бөлек, аталған аумақта Бас жоспар негізінде, жаңа әкімшілік-іскерлік орталық та бой көтермек, – деді Шамхат Қалмурадов.
Сондай-ақ мәслихат төрағасы 9 айдың қорытындысы бойынша атқарылған жұмыстар мен алдағы жоспарлар жөнінде баяндады.
