Келес ауданының қайта құрылғанына 5 жыл толуына орай облыс аумағындағы аудан, қала жастары арасында «Ұлттық спорт – ұлтымыздың құнды мұрасы» атты облыстық жарыс ұйымдастырылды.
Келес ауданы әкімдігі мен аудандық «Жастар ресурстық орталығы» ұйымдастырған бұл сайыс қазақи салт-дәстүріміз бен әдет-ғұрпымызды, сонымен қатар ұлттық спортты кеңінен насихаттау мақсатында өтті.
Сайыстың ашылу салтанатында Келес ауданының әкімі Жәнібек Ағыбаев бұқаралық спорттың маңыздылығына тоқталып, жарысқа қатысушыларға сәттілік тіледі.
Ұлттық спортты ұлықтаған сайыста жастар қазақ күресі, қол күресі, гір тасын көтеру, арқан тарту, тоғызқұмалақ спорттарынан бақ сынады.
Нағыз мықтылар сайысқа түскен додада Сарыағаш ауданының білекті де намысты жастары 15 команданың ішінен өз ептіліктерін көрсетіп, жалпы командалық есепте бас жүлдені иеленді. Ал бірінші орынды Арыс қаласының командасы, екінші орынды Бәйдібек ауданының командасы, үшінші орынды Шардара ауданының командасы жеңіп алды.
Жеңімпаз командалар Алғыс хаттармен марапатталып, оларға бағалы сыйлықтар табыс етілді.
