Әз-Наурыз – түркі халықтарына ортақ қастерлі мейрам. Жыл жаңарып, адамдардың көңілі кеңіп, пейілі түзелетін, бір-бірімен етене араласатын кез – наурыз айы. Сондықтан да қазақ халқының танымында бұл айдың маңызы зор, мәні ерекше.
Осы орайда, Келес ауданында Ұлыстың ұлы күні кең көлемде аталып өтті. 22 наурыз күні Қоңыртөбе елді мекенінде орналасқан кең жайлауда «Наурыз – мерекем, Наурыз – берекем» атты салтанатты шара ұйымдастырылды. Мерекелік жиынды 10 мыңнан аса аудан тұрғыны мен қонақтар шараны тамашалады.
Жазық жайлауда 20-дан астам киіз үй тігіліп, алтыбақандар мен ұлттық ойындарға арналған алаңшалар бой түзеді. Салт-дәстүрлерді паш ететін тағылымды қойылымдар қойылып, түрлі этнос өкілдерінің әндері шырқалды. Жұртшылық қолөнер шеберлері мен ұлттық тағамдардың көрмесін тамашалады.
Шара барысында Келес ауданының әкімі Жәнібек Ағыбаев сөз алып, көпшілікті Наурыз мерекесімен құттықтады.
– Мемлекет басшысы Қасым-Жомарт Тоқаевтың бастамасымен биылғы Наурыз жаңа форматта атап өтілуде. Бұл орайда, Түркістан облысында Наурыз мерекесін 10 күн бойы игі істермен, мазмұнды іс-шаралармен қарсы алудамыз. Бүкіл аудан, ауылдарда елді тазалыққа, бірлікке, елдікке, берекеге бастайтын шаралар ұйымдастырылды. Ұлттық болмысымыз бен мәдениетімізді айшықтайтын құндылықтарымыз, салт-дәстүрлеріміз дәріптелді. Ал бүгін біз Сіздермен Келес төріндегі Наурыз мерекесінде кездесіп тұрмыз. Біздің өңірде де бұл мейрам жаңаша сипат алып, кең дала төсінде тойлаудамыз. Ат шаптырып, ұлттық құндылықтарымызды жаңғыртуда бұл бастаманың үлесі мол деп санаймын, – деді аудан басшысы Жәнібек Есенұлы.
Мерекелік жиын аудандық мәдениет үйінің дайындаған концерттік бағдарламасымен жалғасып, түрлі сахналық қойылымдар қойылды. Сондай-ақ, тұсау кесер, қыз қуу, аударыспақ, көкпар, арқан тарту сынды қазақтың ұлттық ойындары дәріптеліп, көпшілікке көтеріңікі көңіл күй сыйлады. Кең дала төсінде ұйымдастырылған шарада елімізге танымал эстрада жұлдыздары Асан Пердешов, Шәмші Дүкенбайұлы және «Миллион» командасының капитаны Қанат Тасхан өнер көрсетті.
(с) Келес ауданы әкімдігінің баспасөз қызметі
