Мемлекет басшысының қатысуымен Бурабайда өткен Ұлттық құрылтайдың ІҮ отырысы зор маңызға ие болды. Еліміздің Қазақстан халқы Ассамблеясының 30 жылдығына орай қазіргі кезеңнің қоғамдық саяси мәні де терең ойларға жетелейді.
Осы орайда Түркістан қаласындағы Қожа Ахмет Ясауи атындағы Халықаралық қазақ-түрік университетінің профессоры, филология ғылымдарының докторы, Түркістан облыстық Қазақстан халқы Ассамблеясы жанындағы ғылыми-сараптамалық топтың жетекшісі, Түркістан қаласының Құрметті азаматы Сейдулла Садықов Мемлекет басшысы Қасым-Жомарт Кемелұлы Тоқаевтың Ұлттық құрылтайда сөйлеген сөзінде негізінен алғанда ұлттық бірегейліктің негізі болып табылатын әлеуметтік-экономикалық, қоғамдық-саяси өзекті мәселелерді жан-жақты саралағанын атап өтті.
– Осы орайда мемлекеттік жүйенің кепілі саналатын оңтайлы салық саясаты, мемлекеттік басқару ісінде зор маңызға ие бірыңғай уақыт белдеуі, қоғамның қалыпты дамуына кері әсерін тигізіп отырған алаяқтық, «заң мен тәртіп» қағидасының берік орнығуына, тағы да басқа жайларға баса назар аударады. Сондай-ақ Президент алдағы уақытта білім мен ғылымға, халық денсаулығына ауқымды инвестиция салынатынын айтты. Айталық, тек биылдың өзінде елімізде 500 мың оқушыға арналған екі жүзден астам мектеп бой көтеретін болады. Сол сияқты жыл соңына дейін «Ауылда денсаулық сақтауды жаңғырту» ұлттық жобасы аясында 188 медицина нысаны салынады. Жоғарғыдай ауқымды жобалардың ерекше мәртебеге ие болған қасиетті Түркістан қаласы мен облысымыздың серпінді дамуына ықпалы зор болатыны көңілге қуаныш ұялатады, – деді С.Садықов.
«Алдағы салынатын инвестиция – мемлекеттің ең сенімді әрі дұрыс салымы, – деді Қ.Тоқаев. – Біз білім-ғылым, медицина, спорт, креативті индустрия салаларына қомақты қаржы бөлуді жалғастыра береміз. Азаматтардың өзін жан-жақты дамытуы үшін барлық жағдайды жасаймыз. Себебі қазіргі заманда жекелеген адамдардың табысты болып, бақуатты өмір сүруі нағыз қуатты мемлекеттің көрсеткіші саналады».
Мемлекет ұсынып отырған саясаттың өміршеңдігі экономикалық, білім-ғылым, денсаулық сақтау, тағы да басқа салалардағы жетістіктерге тығыз байланысты екенін дәлелдеп жатудың қажеті жоқ. Бұл жөнінде Мемлекет басшысы ұдайы айтып келеді. Бұл тұрғыда Түркістандағы Қожа Ахмет Ясауи атындағы Халықаралық қазақ-түрік университетінің кемелдену бағытындағы қадамдары көңіл қуантады. Бұған білім ордасының соңғы жылдары жоғары оқу орындарының әлемдік рейтингісінде жақсы нәтижелермен танылып отырғанын мақтанышпен айта аламыз. Білім ордасы ғалымдарының өткен жылды жалпы құны 7,5 миллиард теңгеден асатын ғылыми жобалармен айшықтағанын ризалықпен айтуға болады.
Бүгінде әлем қарқынды өзгеріп, жаһандану үрдістері күшейген сайын этносаралық ынтымақтастық пен мәдениетаралық байланыстардың маңызы арта түсуде. Қазақстан көпэтносты қоғам ретінде бейбітшілік пен тұрақтылықты сақтай отырып, өздерінің ұлттық бірегейлігін, мәдени мұрасын, ортақ құндылықтарын нығайту жолында белсенді жұмыс атқаруда. Бұл ретте, университеттердің орны ерекше:
– Университеттер – қоғамдағы этносаралық ынтымақтастықты қалыптастыру мен нығайтудың маңызды алаңы болып табылады. Олар білім мен ғылымды ғана емес, сонымен қатар мәдениетаралық диалог пен өзара түсіністікті дамытуға мүмкіндік береді.
– Университеттер әртүрлі этностардың өкілдерін біріктіретін білім беру орталығы ғана емес, олардың мәдениетіне, салт-дәстүрлеріне құрметпен қарауды үйрететін орта болып табылады.
– Университет қабырғасында әртүрлі этностардан шыққан студенттер бірге білім алып, ортақ жобаларға қатысып, өзара қарым-қатынас жасау дағдыларын қалыптастырады. Бұл олардың болашақта этносаралық ынтымақтастыққа оң көзқараспен қарауына ықпал етеді.
– Университеттер болашақ саясаткерлерді, дипломаттарды, ғалымдарды, мәдениет және қоғам қайраткерлерін даярлайды. Олардың этносаралық байланыстар мен ынтымақтастықтың маңыздылығын түсінуіне мүмкіндік береді.
Өз кезегінде Түркістандағы Қожа Ахмет Ясауи атындағы халықаралық қазақ-түрік университеті этносаралық ынтымақтастық пен түркітілдес әлемді біріктіруге үлкен үлес қосып жүрген университеттердің бірі.
Қожа Ахмет Ясауи атындағы халықаралық қазақ-түрік университеті – Қазақстан мен Түркияның ортақ бастамасымен Қазақстандағы ең алғаш ашылған халықаралық жоғары оқу орны, түркі тілдес мемлекеттер арасында халықаралық мәртебеге ие болған, түркі әлемі жастарының басын біріктірген бірінші білім және ғылым ордасы. Университет миссиясы – Түркі тілдес мемлекеттер мен қауымдастық жастарына бір шаңырақ астында сапалы білім беру және инновациялық оқыту мен ғылыми зерттеулерде көшбасшы болу.
Ахмет Ясауи университеті білім беру, ғылым және мәдениет саласында халықаралық ынтымақтастықты дамытумен қатар, этносаралық келісім мен түркі әлемінің бірігуіне ықпал етуде. Университет бейбітшілікті, этносаралық келісімді және мәдени әртүрлілікті насихаттау арқылы Қазақстан мен түркітілдес елдердің ынтымақтастығын дамытуды мақсат етеді.
Ахмет Ясауи университетінің этносаралық ынтымақтастықты нығайтудағы рөліне тоқталатын болсақ. Ахмет Ясауи университеті этносаралық келісімнің негізгі орталықтарының бірі болып табылады. Бүгінде университет қабырғасында Қазақстаннан ғана емес, Түркия, Ауғанстан, Әзірбайжан, Өзбекстан, Қырғызстан, Қытай, Монголия, Түрікменстан, Ресей және Тәжікстан мемлекеттерінен 1000 студент білім алуда. Бұл студенттер түрлі мәдениетпен, дәстүрлермен және құндылықтармен таныса отырып, өзара толеранттылық пен сыйластық негізінде қарым-қатынас орнатуда. Сондай-ақ университет қабырғасында түрлі мәдени іс-шаралар, көрмелер мен фестивальдар ұйымдастырылады. Бұл іс-шаралар этностар арасындағы қарым-қатынасты нығайтып, өзара түсіністікті дамытуға ықпал етуде.
Ахмет Ясауи университеті тек қана этносаралық келісімді дамытуға емес, сондай-ақ түркітілдес әлемді біріктіруде де маңызды рөл атқарады.
– Университет түркі халықтарының тарихын, мәдениетін және тілін зерттеу бойынша бірлескен ғылыми жобаларға жетекшілік етеді және белсенді қатысады. Осы орайда Түркия, Әзірбайжан, Өзбекстан және Қырғызстан елдерімен білім саласында ынтымақтастық туралы келісімдер жасасқан.
– Түркі мемлекеттері ұйымы жанындағы Түркі университеттері одағы аясында түркітілдес елдердің жоғары білім беру жүйесін интеграциялауды мақсат ететін Орхун академиялық алмасу бағдарламасына университеттің профессор-оқытушылар құрамы мен студенттері белсенді қатысып, өзара мәдени байланыстарды нығайтуда.
– Университет түркі халықтарының ортақ мәдени мұрасын зерттеуге және сақтауға бағытталған ғылыми конференциялар ұйымдастырады. Осы конференцияларда түркі әлемінің ортақ тарихы, мәдениеті және болашақтағы ынтымақтастығы туралы маңызды ғылыми еңбектер талқылануда.
Қожа Ахмет Ясауи атындағы халықаралық қазақ-түрік университеті – этносаралық ынтымақтастық пен түркі әлемінің бірлігін нығайтудағы маңызды орталықтардың бірі. Университет тек қана жоғары білім беру мекемесі ретінде ғана емес, мәдени және ғылыми байланысты дамытушы халықаралық орталық ретінде қызмет атқарады. Бүгінгі таңда этносаралық келісім мен түркі халықтарының бірігуі – тек Қазақстан үшін ғана емес, бүкіл түркі әлемі үшін стратегиялық маңызға ие. Қожа Ахмет Ясауи университеті осы бағытта өз миссиясын табысты орындап, түркі әлемінің мәдени-рухани дамуына үлес қосуда.
– Университет ғалымдарының қоғамдық жұмыстардағы белсенділігі барынша артып келеді. Айталық, Қазақстан халқы Ассамблеясы жанындағы ғылыми-сараптамалық топтың құрамындағы ғалымдардың негізі білім ордасының оқытушы-профессорлары болып табылады. Олардың қай-қайсысы болмасын Ассамблея жұмысын жандандыра түсуге негізделген ғылыми-сараптамалық бағытындағы тақырып төңірегінде ғылыми ізденістер жасауда. Алдағы уақытта ғалымдардың нақты нәтижелерге қол жеткізетініне сенеміз, – дейді ғалым.
Президент Қасым-Жомарт Тоқаев Құрылтайда сөйлеген сөзінде Ұлттық бірегейлігімізді нығайту жолында мәдениет саласының айрықша рөл атқаратынына мән берді. Наурыз мерекесі туралы жаңа тұжырымдама әзірленді. «Ұлттық киім күні» қоғамда зор беделге ие болды. Бұл біздің бірегей ұлттық болмысымыздың маңызды көрінісіне айналып келеді. Бір сөзбен айтқанда, ұлттық бірегейлігіміздің сындарлы кезеңінде барлық мәселеге байыппен қарауымыз керек. Сонда ғана шынайы ұлттық болмысымыз айшықтала түседі.
