Биыл елімізде ұлттық цифрлық инвестициялық платформа іске қосылады.Ұлттық цифрлық инвестициялық платформа инвестициялық жобаларды кешенді сүйемелдеу бойынша ақпараттық жүйе құруды көздейді.

Бұл барлық тарапқа – кәсіпкерлерге және мемлекеттік органдар, қаржы институттары мен квазимемлекеттік сектор өкілдеріне бірдей пайдалы болады.

Цифрлық платформаның функционалы барлық процесті, оның ішінде инвесторлар үшін Қазақстан Республикасында қолжетімді мемлекеттік қызметтерді толық қамтуға мүмкіндік береді.

Инвестицияларды тарту мәселелерінде мемлекеттік қызметтерді цифрландыру – Үкіметтің басым және өзекті міндеттерінің бірі. Ұлттық инвестициялық платформа ең алдымен инвесторлар үшін әзірленіп жатыр. Сондықтан ол барлық ұсынылған қолдау шараларын қамтуы қажет және пайдаланушылар үшін мүмкіндігінше ыңғайлы болуы керек.

Ұлттық инвестициялық платформа көптеген процесті жеңілдетіп қана қоймай, олардың ашықтығын қамтамасыз етеді. Бұл өз кезегінде Қазақстанның инвестициялық тартымдылығын айтарлықтай арттырады. Осыған байланысты мемлекеттік органдарға платформаны іске қосуды жеделдету және жүйеге инвестициялық жобалар бойынша барлық деректі енгізу тапсырылды.

Бүгінде көлік, логистика, денсаулық сақтау және туризм салаларында іске асыру жоспарланған жобалар да маңызды.

Атап айтқанда, көлік саласының инвестициялық әлеуеті бойынша ҮАААЖ жобасын іске асыру мысалында «концессия» механизмін одан әрі дамыту, сондай-ақ азаматтық авиация және теміржол көлігі саласындағы жобалар пулын бірнеше есе ұлғайту өзекті.

Денсаулық сақтау саласы бойынша медициналық жабдықтар өндірісін локализациялау, биотехнологиялық препараттар өндірісін кеңейту және клиникалар салу сынды жекелеген инвестициялық жобалар бойынша жұмыстар жүргізілуде.