Маусымның 16-17 күндері «Маңғыстаудан мың сәлем, Түркі төрі!» атты Маңғыстау облысының Түркістан облысындағы күндері өтеді.
Маңғыстау облысынан келген делегация құрамында облыстық ҚХА басшылығы, Аналар кеңесінің мүшелері, Кәсіпкерлер қауымдастығының өкілдері, меценаттар, ардагерлер бар. Олар бүгін сапарын қасиетті Отырар ауданынан бастады. Қонақтар Арыстанбаб кесенесіне зиярат жасап, музейге аялдап, Отырартөбе қалажұртының тарихымен танысты.
Делегация құрамын арнайы қарсы алған Түркістан облысы қоғамдық даму басқармасы “Қоғамдық келісім” КММ-нің басшысы Эльмира Жанғазиева Маңғыстаудан келген қонақтарды киелі Отырар жерінің тарихымен таныстырды.
Сапар аясында делегация мүшелері Түркістандағы Қ.А. Ясауи кесенесін, сондай-ақ қаланың көрікті орындарын аралады.
Маңғыстаулық өнерпаздар, түрлі сала өкілдері екі күн бойы өңір жұртшылығы үшін мәдени және маңызы зор қоғамдық шаралар ұйымдастырып, рухани кештер сыйламақ. Сонымен қатар Маңғыстау облысының күндері аясында спорттық командалардың кездесулері, ғылыми конференциялар өтіп, қос облысқа ортақ жобалардың жай-күйі талқыланады.
Маңғыстау облысының мәдени күндері екі күнге жалғасады. Алғашқы күні Ә.Кекілбайұлы атындағы Маңғыстау облыстық тарихи-өлкетану музейі және Маңғыстау облыстық мемлекеттік тарихи-мәдени қорығы көрмесінің ашылу салтанаты өтеді. Сонымен қатар «Балалар жылына» арналған этно іс-шара мен «Маңғыстаудан мың сәлем, Түркі төрі!» атты Маңғыстау облысы өнер күндерінің гала-концерті ұйымдастырылады. Ал екінші күні Маңғыстау, Түркістан облысы туризм саласы мамандарының қатысуымен «дөңгелек үстел», кітап көрмесі, екі өңір ақсақалдарының рухани кездесуі, «Farab» кітапханасында «Әлиханның аманаты» қойылымы мен кешқұрым «Керуен сарай» кешенінде концерттер өтеді.
