Түрікстан облысындағы 330 мектеп сәуір айының соңына дейін жоғары жылдамдықты интернетпен қамтылмақ. Бүгінде осы мақсатта өңіріміздегі 203 білім ұясына Starlink спутниктік желісінің құрылғысы орнатылды. Бұдан бөлек тағы 127 мектеп оқушылары кең жолақты интернетке қол жеткізбек.
Облыс әкімі аппаратының басшысы Еркеғали Әлімқұлов Қазығұрт және Төлеби аудандарына іссапармен барып, Starlink спутниктік желісінің құрылғысы қойылған мектептерді аралады. Аппарат басшысы алдымен Қазығұрт ауданы, Еңбек елді мекеніндегі «Еңбек» жалпы орта мектебінде болды. Аталмыш білім ошағы «Қазақтелеком» АҚ байланыс операторының техникалық мүмкіндігіне қарай радиокөпір технологиясымен 20 Мбит/с дейінгі интернет желісімен қамтылған болатын.
Қазығұрт ауданындағы 71 мектептің 24-іне Starlink спутниктік желісінің құрылғысы қойылған. Солардың бірі «Еңбек» жалпы орта мектебінде бүгінде 157 оқушы білім алуда. Мектеп директоры Нұржан Төреқұлов:
– Елімізде білім беру жүйесінде цифрлық оқытуға арналған ресурстарды қолдануда интернет маңызды рөл атқарады. Сондықтан бізге жоғары жылдамдықты ғаламтор аса қажет еді. Міне, өздеріңіз көргендей, мектебіміз жылдамдығы 200 Мбит/с болатын кең жолақты интернет желісіне қосылып жатыр. Бұған шексіз қуаныштымыз. Біз үшін енді «Күнделік» жобасымен жұмыс істеуде ешқандай қиындық туындамайды, – деді.
Мұнан кейін аппарат басшысы Төлеби ауданы, Киелітас ауылдық округі, Сұлтанрабат елді мекеніндегі «Жыланбұзған» жалпы орта мектебінің оқушыларымен және мұғалімдерімен кездесті. Аталмыш білім ошағы бұған дейін жылдамдығы 20 Мбит/с болатын интернет желісімен қамтылған-ды. Бүгінде мұнда Starlink спутниктік желісінің құрылғысы орнатылып, мұғалімдер мен оқушыларға интернетті кедергісіз қолдануға мүмкіндік туды. Айта кетейік, «Жыланбұзған» мектебінде 514 оқушы білім алуда.
