Елімізде бірнеше жылдан бері түрлі салалар мен жүйелерді цифрландыру жұмыстары үздіксіз жүргізіліп келеді.
Мәселен, «Азаматтарға арналған үкімет» құрылғаннан кейін 8 жыл ішінде 302 миллионнан астам мемлекеттік қызмет көрсеткен екен. Жалпы, бүгінгі таңда «Азаматтарға арналған үкімет» арқылы 1281 қызмет түрін алуға болатын болса, оның 41-і қағаз жүзінде, 486 қызмет – қағаз және электронды түрде және 754-і тек электронды түрде көрсетіледі. 2023 жылдың қорытындысы бойынша сұранысқа ие мемлекеттік қызметтердің көшін бастаған электрондық цифрлық қолтаңба алу қызметі. Оған 3,4 миллион рет тапсырыс берілген. Екінші орынға – көлік құралдарын тіркеу, ал үшінші орынға – жүргізуші куәліктерін алу қызметі жайғасқан.
Қазіргі таңда «Азаматтарға арналған үкімет» мемлекеттік корпорациясының ел бойынша 263 ХҚКО-сы мен 25 автодромы, 30 мамандандырылған ХҚКО-сы (арнайы секторларды қоса алғанда), 7 көші-қон қызметтері орталығы және 35 секторы (сұранысқа ие қызметтерді көрсететін бөлім) бар екен.
«Азаматтарға арналған үкімет» – халық үніне құлақ асатын мемлекеттің бейнесі. Цифрлық даму, инновациялар және аэроғарыш өнеркәсібі министрінің тапсырмасы бойынша басқа ведомстволармен бірлесе отырып, мемлекеттік қызметтер көрсету жөніндегі барлық платформаларды бірыңғай кеңістікке біріктіреміз. ИАЖ ХҚКО 2.0, 1414 байланыс орталығы,eGov.kz, eGov mobile смартфонда, үйдегі компьютерде, оператордың мониторында бір интерфейске ие және кез келген құрылғыдан қызмет алуды бастап, басқа құрылғыдан аяқтауға мүмкіндік береді және қолжетімді етеді», – деді «Азаматтарға арналған үкімет» Мемлекеттік корпорациясының Басқарма Төрағасы Арман Кенжеғалиев.
