Шымкенттегі қайта қалпына келтіруден өтіп жатқан «Металлург» стадионы 2022 жылы пайдалануға беріледі. Бұл жөнінде «Nur Otan» партиясы Шымкент қалалық филиалы партияның «Өзгерістер жолы: Әр азаматқа лайықты өмір!” атты сайлауалды бағдарламасы аясында алдағы бес жылда атқарылатын жұмыстардың реті жазылған Жол картасында да жазылған.
Жол картасында көрсетілген жұмыстардың дер кезінде орындалуын бақылау Шымкент қаласы мәслихатының депутаттарына жүктелген. Халық қалаулыларына белгіленіп берген нысандардың қатарында «Металлург» стадионы бар.
Таяуда Шымкент қаласы мәслихатындағы бірқатар депутаттар аталған нысанның басына барып, құрылыс жұмыстарымен танысып қайтты. Қазіргі таңда құрылыс жұмыстары кестеге сай жүріп жатыр. Қайта қалпына келтіру жұмыстары «Жұмыспен қамтудың жол картасы» бағдарламасы аясында өткен жылдың наурыз айында қолға алынған. Жұмыстың ырғақты жүруі алдағы уақытта да партия бақылауында болады.
Айта кетейік, спорт кешені өткен ғасырдың 70-ші жылдары салынған және 2017 жылы әкімдік балансына өткен.
