Қазақстан үшін ғарыш саласының маңызы зор. Министрлік Қазақстанның аэроғарыш өнеркәсібін дамытуға баса назар аударады, сондай-ақ «Байқоңыр» кешенінің туристік әлеуетін жақсартуға ерекше көңіл бөлуді көздеп отыр.
Цифрлық даму, инновациялар және аэроғарыш өнеркәсібі министрі Жаслан Мәдиев Зенит ҒЗК нысандарын аралады, оның негізінде «Бәйтерек» жаңа ғарыштық зымыран кешені құрылуда.
Сондай-ақ, Қазақстан Республикасының Цифрлық даму, инновациялар және аэроғарыш өнеркәсібі министрі Ж.Х. Мәдиев және «Роскосмос» мемлекеттік корпорациясының бас директоры Ю.И. Борисовтың жұмыс кездесуі өтті. Кездесу барысында «Байқоңыр» кешеніндегі ынтымақтастықтың өзекті мәселелері, сонымен қатар «Бәйтерек» бірлескен жобасының іске асырылу барысы талқыланды, сондай-ақ «Протон» ҒЗК нысандарына барды, әріптестер жердегі ғарыштық инфрақұрылым нысандарында ұшыру алдындағы жұмыстарды көрсетті.
Таяуда сенатор Ғалиасқар Сарыбаев өзінің депутаттық сауалында Қазақстанның қолда бар ғарыштық әлеуетін сақтау және зымыран ғылымын дамыту жөнінде пәрменді шаралар қабылдауға шақырған болатын.
Сенатордың айтуынша, «Байқоңыр» ғарыш айлағы – Қазақстанның маңызды ғарыш ресурсы, алайда аэроғарыш өнеркәсібіндегі күрделі жағдайға байланысты оның дамуына қауіп төніп тұр. Ғарыш саласын дамыту проблемаларын шешу Қазақстан Үкіметінің басты міндеті болуы тиіс. Ғарыш саласын дамытудың мемлекеттік бағдарламалары 2014 жылдан кейін жалғасын таппаған. Сондықтан аталған саладағы мемлекеттік саясатты қайта қарау және ұзақ мерзімді даму тұжырымдамасын әзірлеу керек.
Сенатор соңғы жылдары біздің ғарыш айлағымызға сұраныс төмендеп бара жатқанын, сондықтан Қазақстан «Союз-5» жаңа зымыран тасығышын пайдалана отырып «Бәйтерек» жобасын іске асыруды бастағанын атап өтті.
Геосаяси жағдайға байланысты жоба қазіргі уақытта үзіліске душар болған. Байқоңыр ғарыш айлағының белсенділігін сақтау үшін жаңа жұмыс орындарын ашу және мамандардың құзыретін арттыру, сондай-ақ басқа да бірегей зымыран кешендері мен ғарыш инфрақұрылымын пайдалану және «Бәйтерек» жобасын іске асыруды жалғастыру маңызды.
