Мемлекет басшысының Мемлекеттік аппараттың қызметін бюрократиядан арылту жөніндегі Жарлығы мен Сайлауалды бағдарламасын орындау аясында азаматтардың өмірін жеңілдетіп, бизнеске қолайлы жағдай жасауға бағытталған цифрлық сервистерді енгізу бойынша жұмыс жалғасып жатыр.
Бұл орайда, мәселен, Қорғаныс министрлігінің әскерге шақыру бойынша тіркеу науқанын проактивті форматқа ауыстыру жөніндегі жобасы іске асырылды. Бұл азаматтарды әскери комиссариаттарға бару, медициналық куәландырудан өту және жеке іс үшін құжат жинау қажеттілігінен босатады. Сондай-ақ, шақыру учаскелеріне тіркелу туралы куәлік алу қажет болмайды. Деректер базасын интеграциялау ел аумағында тұрғылықты жерді өзгертуге байланысты әскери комиссариатқа жүгіну қажеттігінен босатады.
Сонымен қатар, Қаржы министрлігі шекарадағы өткізу бекеттерінде электронды кезек жүйесін енгізді, «E-Salyq Azamat» мобильді қосымшасында «жеке тұлғалар үшін кедендік декларациялау» қызметі іске қосылды.
Әділет министрлігі сенімхат рәсімдеуге және онлайн-форматта нотариус кеңесін алуға мүмкіндік беретін «Е-нотариат» платформасын сәтті іске қосты.
Бұдан бөлек, дипломның түпнұсқа екенін тексеру мақсатында Оқу-ағарту министрлігі техникалық, кәсіптік және орта білімнен кейінгі білім туралы дипломдарға QR-кодтар енгізді.
Денсаулық сақтау министрлігі өткен жылы МӘМС процестерін цифрландыру, еңбекке жарамсыздық парағының қағаздағы нұсқасынан бас тарту, 075/у формасындағы анықтаманы цифрлық форматқа көшіру, скринингтен өту қажеттігі туралы проактивті хабарлап отыру қызметін іске қосу, мекенжай өзгерген кезде медициналық мекемеге автоматты түрде тіркеу қызметін енгізу бойынша пилоттық режимде жұмыс жүргізді.
