– «Біз шалғай аудандардағы шаруалардың алдына өзіміз барып, олардың жағдайын көзбен көріп, кәсіпкерлерге шынайы қолдау білдіруіміз керек»
Түркістан облысының кәсіпкерлер палатасының Өңірлік кеңесінде осылай деген облыс мәслихатының төрағасы Нұралы Әлмаханұлы барлық кеңес мүшелерін кәсіпкерлердің мүддесін қорғауда белсенді болуға және кеңес жұмысына немқұрайлы қарамауға шақырды. Өңір кәсіпкерлері үшін маңызды шешімдер қабылданатын алаң қалыптастыру өте маңызды екенін атап өтті.
Жиынға «Атамекен» ҚР Ұлттық кәсіпкерлер палатасы басқарма төрағасының орынбасары Тимур Нақыпбеков, Өңірлік кәсіпкерлер палатасының директоры Асылан Ибадуллаев, облыс мәслихатының депутаттары А.Салимов, С.Көшенов, Б.Байғараев, И.Намазбаева, Е.Хандиллаев, Е.Ералиев, Б.Серманизов және кеңес мүшелері қатысты.
🔹 Айта кетейік, сайлау қорытындысының нәтижесінде кеңес құрамы 40 пайызға жаңарып, 16 аудандық және 7 салалық кеңестен барлығы 23 мүше енді.
Отырыс барысында Өңірлік кеңестің төрағасын қайта сайлау өтті. Кеңес мүшелері өз таңдауларын жасап, өңірлік кеңестің төрағасы болып Әбішов Нұралы Әлмаханұлы сайланды.
«Мемлекет басшысы еліміздің экономикасын өркендету бағытында нақты міндеттер мен айқын қадамдар жасап жатыр. Біз де барлық мәселелерді бірлесе шешуіміз керек. Сонымен қатар, бизнес мүддесін қорғауда табанды болуымыз қажет. Бұл кеңес тек облыс орталығындағы жиынмен шектелмеуі тиіс. Енді аудандарға барып, кәсіпкерлердің талап-тілегін тыңдап, мәселенің нақты шешімдері үшін жұмыс жасайық» – деді төраға.
Кездесуде 2025 жылға арналған жұмыс жоспары бекітіліп, аудан және қалаларға шығу кестесі қаралды. Бұл бағытта Нұралы Әлмаханұлы барлық кеңес мүшелерін кәсіпкерлердің мүддесін қорғауда белсенді болуға және кеңес жұмысына немқұрайлы қарамауға шақырды. Өңір кәсіпкерлері үшін маңызды шешімдер қабылданатын алаң қалыптастыру өте маңызды екенін атап өтті.
Жанар Әуез
