НҰРБОЛ ТҰРАШБЕКОВ: БІРЛЕСЕ АТҚАРҒАН ІС БЕРЕКЕЛІ БОЛАДЫ

895
Түркістан қаласының әкімі Нұрбол Тұрашбеков қалалық мәслихат депутаттарымен, үкіметтік емес ұйым жетекшілерімен және әр сектордың белсенді азаматтарымен кездесіп, қаланы дамытудың белгіленген жоспарымен бөлісті. Өзекті мәселелерді шешу жолдарын ұсынып, көпшілікпен пікірлесті.
Түркістанның жалпы аумағы соңғы үш жылда 19,6 мың гектардан 22,4 мың гектарға ұлғайып, халық саны 165,4 мың адамнан 220 мыңға жуықтады.
Тұрғындарды толғандырған өзекті мәселелер қатарында жол, қоғамдық көлік, қызмет көрсету саласымен қатар тазалық та кеңінен сөз болды. Облыс орталығындағы оңды істер тек жұдырықтай жұмылаудың нәтижесінде жүзеге асатыны айтылды.
– Нақты жоспар мен сол жоспарларды жүйелі іске асыру үшін бірлік керек. Баршамыз ортақ мақсат пен бір мүдде айналасында топтассақ қана тірлік ілгерілеп, нәтижеге жетеміз, – дей келе Нұрбол Әбдісаттарұлы негізгі мақсаттарға тоқталды.
Жиынға қатысушылар атқарылатын жұмыстар бойынша өз ұсыныстарын айтып, қала басшысының бастамаларын қай кезде де қолдауға дайын екендерін жеткізді.