Биыл – Қазақстан халқы Ассамблеясының құрылғанына 30 жыл. Бірлік, татулық және ынтымақ – елдігіміздің мызғымас тұғыры һәм мемлекетіміздің басты құндылығы. Қазақстан халқы Ассамблеясы міне, осы идеологияны сеніммен, жүйелі жүзеге асырып келеді. Мемлекет басшысы Қасым-Жомарт Тоқаев та былтыр аталған ұйымның «Бірлік. Жасампаздық. Өрлеу» атты ХХХІІІ сессиясында барша халқымыздың стратегиялық бағдарының түпкі мәнін осы үш ұғым дәл әрі нақты білдіретінін, ел саясатының бұлжымас бағдары болып қала беретінін айтты. Осы ретте Түркістан облысы Ассамблея жастарының бірі Нусратуллаева Интизораның ұлттық татулық, бірлік жайында пікірін назарларыңызға ұсынамыз.
– Қоғамдық келісім – мемлекеттің тұрақты дамуы мен өркендеуінің негізгі алғышарты. Ел бірлігі мен ынтымағы болмаса, кез келген реформаның, бағдарламаның, тіпті мемлекеттің болашағы да бұлыңғыр болмақ. Тәуелсіздік алған сәттен бастап Қазақстан этносаралық келісім мен ұлтаралық татулықты мемлекеттік саясаттың өзегіне айналдырды. Бұл жолда елімізде арнайы құқықтық және институционалдық база құрылып, Қазақстан халқы Ассамблеясы сияқты бірегей институт жұмысын бастады. 1995 жылы құрылған бұл құрылым бүгінде елдегі 130-дан астам этнос өкілінің достығы мен ынтымағын нығайтуда орасан зор рөл атқарып келеді.
Қоғамдық келісім – бұл жай ғана ұлттар мен ұлыстар арасындағы бейбіт өмір сүру емес, бұл – ортақ мақсат, бірлік, ортақ құндылықтар жүйесі. Қазақстанда тұратын әрбір этнос өкілі өзін осы мемлекеттің толыққанды азаматы ретінде сезінуі тиіс. Бұл үшін мемлекет тарапынан тең құқық, мәдени дамуға жағдай, тіл мен дәстүрді сақтауға қолдау көрсетілуде. Этномәдени бірлестіктердің жұмысы, «Достық үйлері», мәдени және діни алаңдар осы бағытта қызмет етуде. Бұл қызмет ел игілігіне жұмыс жасап жатыр деп сеніммен айтуға болады
Бүгінгі таңда Қазақстанның түрлі өңірлерінде, оның ішінде Түркістан облысында да қоғамдық келісім мен бірлікті нығайтуға арналған түрлі жобалар жүзеге асырылып келеді. Облыстағы 20-дан астам этномәдени бірлестік пен олардың жанындағы жастар ұйымдары, аналар кеңестері қоғамдық іс-шаралардың ұйытқысы болып отыр. Мәселен, «Ақылды ана – саналы бала», «Бірлік пен татулық – ел тұтастығының кепілі», «Достық керуені» сынды шаралар этносаралық татулықты насихаттап, жастарды толеранттылыққа тәрбиелеуге бағытталған.
Сонымен қатар, қоғамдық келісімнің тағы бір маңызды тетігі – медиация институтының дамуы. Бұл институт әлеуметтік келіспеушіліктер мен дау-жанжалдарды бейбіт жолмен шешуге мүмкіндік береді. Қоғамда төзімділік пен түсіністікті қалыптастыру үшін мектептер мен жоғары оқу орындарында «Достық клубтары», «Толеранттылық сабақтары» жұмыс істеуде. Бұлар жас ұрпақтың бойында бірлік пен ынтымаққа құрметпен қарау сезімін қалыптастыруға бағытталған. Қазақстан халқы Ассамблеясының міндеті – достықты нығайту ғана емес, оған қоса әр ұлттың тілін, тарихын, мәдениетін, салт-дәстүрін сақтап, қоғамдағы тұрақтылықты нығайту бағытында түрлі іс-шаралар өткізу болып табылады. Елбасымыздың телеранттылық ұстанымына сәйкес өзге ұлт өкілдері де қазақ тілін, тарихын, мәдениетін, дәстүрін жете білуі керек. Дегенмен, олар өз ұлтының құндылықтырын еркін меңгеріп өсіп келеді. Қиын-қыстау заманда қазақ елін паналап, қамқорлығын, жақсылығын, кеңпейілділігін, адамгершілігін, қонақжайлылығын көрген өзге этнос өкілдері қазақ халқын жоғары бағалап, құрметтейді. Өзге ұлт өкілдері қоныстанған аймақтарда, сол ұлттың тілінде балабақша, мектеп көптеген ұйымдар өз міндеттерін атқарады.
Қоғамдық келісім – тек мемлекеттің ғана емес, әр азаматтың жауапкершілігі. Бұл ортақ мүддеге негізделген, барша қазақстандықтарды біріктіретін ұлы күш. Біздің басты құндылығымыз – бейбіт өмір, татулық пен тұрақтылық. Оны сақтау – бәріміздің ортақ міндетіміз. 30 жыл ішінде Ассамблея өзінің бастапқы миссиясының шеңберінен шықты. Бүгінде ол еріктілікпен, қайырымдылықпен, әлеуметтік қолдаумен айналысады. Өткен жылы су тасқыны болған кезде ҚХА бірінші болып көмекке келді. Жақында Достық үйінде ақсақалдар мен жастардың диалогы өтті. Бұл Ассамблея ұлтаралық өзара іс-қимыл үшін тұғырнамаға айналғанын көрсетеді
Қорытындылай келе, қоғамдық келісім – мемлекеттіліктің негізі, халықтың әл-ауқаты мен рухани дамуының кепілі. Мұратқа жолын тапқан жетеді. Еңбегіміздің жанбағы біздің ортақ үйімізді бейбітшіліктің бесігі етіп, барды бағалай білуімізге байланысты. Қазақты қасиетті қара шаңыраққа баласақ, еліміздегі барша этностар – сол шаңыраққа шаншылған уықтар. Тарих сабақтары көрсеткендей, ұлттар мен ұлыстар арасындағы бірліксіз тұрақты даму мүмкін емес. Сондықтан да «Қоғамдық келісім – бәрінен қымбат» деген сөз тек ұран емес, бұл – болашағымызды айқындайтын өмірлік ұстаным.
