8 шілде күні ҚР Оқу-ағарту министрі Асхат Аймағамбетов Түркістан облысына жұмыс сапарымен келді. Министрлер есептерінің жаңа форматы аясында халық алдында есеп беру кездесуін өткізді. Сонымен қатар бірқатар ауданның білім беру ұйымдарын аралап, білім бөлімдерінің басшыларымен кеңес құрды.
Жиынға облыстың 500-ге жуық тұрғыны қатысты. Үш сағатқа жуық уақыт бойы ата-аналар қауымы, кәсіподақ, үкіметтік емес ұйымдар өкілдері, білім саласының қызметкерлері мен журналистер өздерін қызықтырған сұрақтарына жауап алды.
ҚР Оқу-ағарту министрі өз кезегінде барлық қойылған сұраққа жан-жақты және нақты жауап берді. Атап айтсақ, мектеп директорларын ротациялау, білікті педагогтарды еліміздің 4 облысына тарту, балабақшаларды лицензиялау, білім беру ұйымдарындағы штат, инклюзивті білім беру, білім беру үрдісіндегі тәрбие сияқты түрлі тақырыптарға қатысты мәселелер көтерілді.
Халықпен есеп беру кездесуінен кейін министр бірқатар тұрғындарды жеке қабылдады. Азаматтарды қабылдаудан кейін Түркістан облысының адами әлеуетті дамыту басқармасының өкілдерімен, сондай-ақ облыстағы колледж басшыларымен кездесу өткізді.
— Әр кездесу сайын әріптестерімнің сұрақтарының мазмұны мен бағыты өзгеріп жатқанын байқап жүрмін. Мәселен, кеше ғана білім басқармаларының бұрынғыдай аудан әкімдіктеріне емес, облыстың білім басқармаларына бағынатынының оң әсерін атап өтті. Бұл бірден ауқымды проблемаларды шешуге мүмкіндік берді. Мысалы, мұғалімдердің тікелей міндетінен тыс функцияларға жиі араласуы. Әріптестер бұрын өздерінің түрлі іс-шараларға қатысып, негізгі жұмыстарынан алшақтап қалатын кездерін еске алды. Қазір жағдай мүлде басқаша, себебі педагогтер заң бұзылған жағдайда құқықтары қорғалатынын біледі. Өйткені білім бөлімдері қазір білім беру мәселелерімен тікелей айналысады, — деді министр.
Сонымен қатар білім беру ұйымдарындағы тамақтану және баға саясатын қалыптастыру, мұғалімдердің біліктілігін арттыру курстары, әдістемелік кабинеттердің жұмысы, колледж студенттерінің жатақханасын күтіп ұстау, арнайы пәндерді оқыту, оқу жүктемесі мәселелері талқыланды. Нормативті құқықтық актілерге өзгерістер енгізуді көздейтін ұсыныстар да айтылды.
Министрлік өкілдерінің хабарлауынша, Қазақстанда Балалар жылында балаларды арнайы психологиялық-педагогикалық қолдаумен қамту 40%-дан аса көрсеткішке артты. Бұған психологиялық-медициналық-педагогикалық консультациялар (ПМПК), психологиялық-педагогикалық түзету кабинеттері (ППТК), оңалту орталықтары мен логопедиялық орталықтар желісін кеңейту ықпал етіп жатыр. Былтыр орталықтарға 30 мың бала барса, биыл олардың саны 53 мыңға дейін артып отыр. Қолданыстағы ПМПК-ларды кеңейту және жаңаларын ашудың арқасында арнайы психологиялық-педагогикалық қолдаумен қамтуды арттыру мүмкін болды. Мысалы, былтыр елімізде 10 психологиялық-педагогикалық түзету кабинеті ашылған болатын. Енді республикадағы ППТК-ның жалпы саны 211-ге жетті. Мемлекет басшысының тапсырмасы бойынша баланың дамуындағы проблемаларды ерте анықтау және түзету үшін қосымша жағдайлар жасалып жатыр. Ол үшін қазір психологиялық-медициналық-педагогикалық консультациялар, психологиялық-педагогикалық түзету кабинеттері, оңалту орталықтарының саны артып келеді.
Жиында белгілі болғандай, Оқу-ағарту министрлігі қазақстандық колледждердің студенттері үшін ақпараттық-танымдық Telegram арнасы мен «ZHASTALAP» чатын іске қосты. Бұл – техникалық және кәсіптік білім беру ұйымдарының студенттерін біріктіретін еліміздегі алғашқы Telegram арна. Қазірдің өзінде арна жазылушыларының саны 11 мыңнан асты, ал чат-ботта 9 мыңға жуық адам бар. Ведомство студенттердің барлық контингентін қамтуды жоспарлап отыр.
– Telegram арнасы колледж студенттерін ТжКБ саласындағы өзгерістер туралы уақытылы хабардар ету мақсатында құрылған. Бұл арнадан студенттер қоғамдық ұйымдар мен кәсіпорындардың әлеуметтік жобалары, білім беру ұйымдары туралы ақпаратты және конкурстар туралы біле алады, сонымен қатар жұмыс туралы хабарландыруларды таба алады. Студенттер чатта білім алмасып, оқу, көркемдік электронды кітаптарды сұрай алады, сондай-ақ өздерін қызықтыратын сұрақтар бойынша министрлікке тікелей хабарласып, кері байланыс ала алады. Осылайша біз студенттердің мәселелеріне уақытылы жауап беруді, оларды шешу жолдарын іздеуді жоспарлап отырмыз, бұл әрбір колледждегі нақты жағдайды көруге көмектеседі, – деді Оқу-ағарту министрлігі Техникалық және кәсіптік білім департаментінің директоры Насымжан Оспанова.
Сонымен қатар департамент «Атамекен» ҰКП-мен бірлесе отырып, студенттердің өздерінің стартаптары мен ғылыми жобаларын жүзеге асыруы үшін бизнес-қауымдастықтарды чатқа қосуды жоспарлап отыр.
Жиын соңында Асхат Қанатұлы кездесуге қатысқан барша тұрғындарға уақыт бөліп, білім саласына бей-жай қарамағандары үшін алғысын білдірді.
