Түркістан қаласында 38 мектеп болса, оның 33-і екі ауысымда, 5 мектеп бір ауысымда білім береді. Ал 4 мектепте күрделі жөндеу жұмыстары жүргізіліп жатыр. Осы мақсатта Түркістан қаласының әкімі Әзімбек Пазылбекұлы қала аумағында күрделі жөндеуден өтіп жатқан бірқатар білім беру ұйымдарын аралап, құрылыс-монтаж жұмыстарының барысымен танысты. Сапалы білім беру ісін қамтамасыз ету мақсатында жүргізіліп жатқан жұмыстардың жай-күйін бақылаған қала басшысы сала мамандарына бірқатар ескертпелер жасады.
Алдымен қала әкімі №9 Некрасов атындағы жалпы орта мектепке барып, білім ұясының жағдайымен танысты. Аталған мектепте 2700-ден астам оқушы білім алған. Қазіргі таңда күрделі жөндеу жұмыстары жүргізіліп, толық заманауи бағытта қайта жаңғыртылмақ.
Сонымен қатар, С.Ерубаев атындағы №7 мектеп-интернаты мен 31 Абай атындағы жалпы орта мектепте атқарылып жатқан күрделі жөндеу жұмыстарының жай-күйімен танысты. Нысандардағы құрылыс жұмыстарының барысын бағамдаған қала басшысы сапасыз жұмыстарға жол берілмеу қажеттігін ескертіп, жауапты мердігерге құрылыс үдерісін жүйелі жүргізуді тапсырды.
Аталған нысандардың барлығына жобалық-сметалық құжаттама әзірленіп, мемлекеттік сатып алу конкурсы арқылы мердігер мекемелер анықталған. Құрылыс-монтаж жұмыстары биыл мамыр айының соңында басталған. Қазіргі таңда барлық нысандарда жөндеу жұмыстары жоспарға сәйкес жүргізілуде.
Айта кетейік, Мемлекет басшысы Қасым-Жомарт Тоқаев өзінің жыл сайынғы Қазақстан халқына Жолдауларында білім беру саласына ерекше мән беріп келеді. Ол білім саласын ұлттың болашағын анықтайтын стратегиялық бағыт ретінде атап көрсетіп, оны реформалауға, цифрландыруға, сапасын көтеруге және ұстаз мәртебесін арттыруға байланысты нақты тапсырмалар берген-ді. «Жаңғырту» жобасына облыстан 115 мектеп енгізілді, оларды 2025–2027 жылдары күрделі және ағымдағы жөндеу жұмыстары жүргізілмек. Биыл облыста 41 мектепке жөндеу жұмыстары жоспарланған «Жайлы мектеп» жобасы аясында 29 мектептің құрылысы жоспарланған, оның ішінде 13-і пайдалануға берілген, тағы 16 мектепті жыл соңына дейін іске қосу көзделуде. Түркістан облысында білім ошақтарын жаңғырту және салу жұмыстары қарқынды түрде жүргізілуде. Бұл шаралар оқушы орындарының тапшылығын жою, апатты және үш ауысымды мектептер мәселесін шешу мақсатында қолға алынған.
Түркістан облысында 2025-2027 жылдары 115 мектептің ғимараттарына күрделі және ағымдағы жөндеу жұмыстары жүргізіледі. Бұл жұмыстарға асхана, кітапхана, спорт зал, сынып бөлмелерін жабдықтау, қауіпсіздік жүйелерімен, пән кабинеттерімен, жиһаздармен қамтамасыз ету кіреді. Жалпы құны 64,3 млрд. теңге көлемінде қаржы қарастырылған.