Цифрлық даму, инновациялар және аэроғарыш өнеркәсібі вице-министрі Асхат Оразбек Қазақстанда жаңа ұялы байланыс операторлары пайда болатынын мәлімдеді.
Асхат Оразбектің айтуынша, «Қолжетімді интернет» жобасы аясында байланыс нарығына жаңа шағын және орта байланыс операторлары шығады.
«Біздің елде «Қазақтелеком» компаниялар тобы атынан доминант және бір тәуелсіз ұялы байланыс операторы – Beeline жұмыс істейді. Қазіргі уақытта «Мобайл Телеком-Сервис» жеке инвесторға сатылады және нарықта үш оператор пайда болады», деді вице-министрі Асхат Оразбек.
Ұялы байланыс операторларының тарифтерін төмендету мақсатында Цифрлық даму, инновациялар және аэроғарыш өнеркәсібі министрлігі оларды қажетті инфрақұрылыммен қамтиды. Асхат Оразбек осы ұсыныс есебінен операторлар бағаны төмендетуі керек екенін айтты. Сондай-ақ ол интернет сапасында да айтарлықтай оң өзгеріс болатынын алға тартты.
Жалпы, министрлік салалық мемлекеттік орган ретінде Қазақстанның барлық халқын жоғары жылдамдықты интернетпен қамтамасыз ету мақсатын көздейді. Яғни, басты мақсат – 2027 жылға қарай, ауылдарда дамыған телекоммуникациялық инфрақұрылымға қол жеткізу, бұл қала мен ауыл арасындағы цифрлық теңсіздікті азайтуға көмектесері анық. 2027 жылы жоба аяқталғаннан кейін кемінде 2,3 млн. ауыл тұрғыны жылдамдығы 100 Мбит/с құрайтын Интернет желісіне қол жеткізу арқылы жоғары жылдамдықты байланыс инфрақұрылымына қосылу мүмкіндігіне ие болады.
Бұған дейін Цифрлық даму министрлігінің басшысы атап өткендей, жеке операторлардың инвестицияларын қолдай отырып, министрлік байланыс инфрақұрылымын дамытуға және нарықтың бәсекеге қабілеттілігін арттыруға ынталандыруды қамтамасыз етеді. Барлық мүдделі тараптардың: мемлекеттің, ірі байланыс операторларының және шағын интернет провайдерлерінің ынтымақтастығы мен күш-жігерін шоғырландыру телекоммуникациялық нарықты дамыту үшін барынша қолайлы жағдайлар жасауға мүмкіндік береді.
Қазіргі таңда Қазақстанда 90-ға жуық орта және шағын оператор жұмыс істейді. Бүгінде олардың ішінен шағын және орта операторлар қауымдастығы құрылды.
