Түркістан облысында медицина саласын дамыту, ғылым мен технологияның заманауи жетістіктерін қолдана отырып, халыққа сапалы әрі қолжетімді қызмет көрсету және ңірлік әлеуметтік-экономикалық даму мақсатында жүйелі жұмыстар жүргізілуде. Соның аясында бүгін Ордабасы ауданы, Қараспан ауылында жаңа дәрігерлік амбулатория ел игілігіне пайдалануға берілді.
Жаңа нысанның ашылу салтанатына Түркістан облысының әкімі Нұралхан Көшеров арнайы қатысып, ауыл тұрғындарын құттықтады. Елімізде әлеуметтік инфрақұрылымды жақсартуға ерекше көңіл бөлініп жатқанын атап өтіп, жұмыстар жалғасатынын жеткізді.
– Алдымен баршаңызды кеше өткен Тәуелсіздік күнімен құттықтаймын. Мемлекет басшысы Қасым-Жомарт Кемелұлы Тоқаев «Бірінші кезекте билік тарапынан денсаулық сақтау, білім беру, әлеуметтік қолдау бағытында нақты шаралар қолға алынуы керек» деп, нақты тапсырма жүктеген болатын. Біздің ең басты мақсатымыз – облыстағы әрбір тұрғынның бақытты өмір сүріп, сапалы медициналық қызметтерге қол жеткізуіне мүмкіндік жасау. Сондықтан тұрғындардың денсаулығын қорғау – өңір дамуының стратегиялық бағыты. Түркістан облысы еліміздің ең серпінді дамып келе жатқан өңірлерінің біріне айналуда. Облыста 2025 жылы жергілікті бюджет есебінен 34 медициналық-санитариялық алғашқы көмек нысандарының құрылысы жүргізілді. Бүгін солардың бірі – Қараспан дәрігерлік амбулаториясының ашылу салтанатына қатысып отырмыз. Жаңа дәрігерлік амбулатория ел игілігіне қызмет етіп, ауыл тұрғындарына сапалы медициналық көмек көрсетеді. Дәрігерлеріміз өз істеріне адал болып, еліміздің бұдан әрі дамуына өз үлестерін қоса береді деп сенемін, – деді Нұралхан Оралбайұлы.
Нысанның құрылысы 2024 жылдың қараша айында басталған. Құрылыс жұмыстарын «Лидер Строй» ЖШС атқарды. Жаңа медициналық нысан Түркістан облысы әкімдігінің денсаулық сақтау басқармасына қарасты «Ордабасы орталық аудандық ауруханасы» ШЖҚ МКК теңгеріміне берілді. Жобаның құны – 201 млн. теңге. 0,25 гектар аумақта орналасқан ғимараттың жалпы алаңы – 376,9 шаршы метр. Мұнда 52 медицина қызметкері еңбек етеді. Нысан заманауи талаптарға сай салынып, қажетті медициналық құрал-жабдықтармен толық қамтылған. Дәрігерлік амбулатория тіс дәрігері, физиотерапия, акушер-гинекология, кеңейтілген мейіргер бөлмесі, тегін дәрі-дәрмек босату орны, дені сау бала бөлмесі, күндізгі ем алу бөлмесі, сүзгі бөлмесі, ине және екпе егу бөлмесі, дезинфекциялық ерітінді дайындау бөлмесі, дәрі-дәрмек қоймасы, педиатр, психолог және әлеуметтік қызметкерлерге арналған арнайы кабинеттермен қамтылған. Дәрігерлік амбулатория бір мезетте 100 адамды қабылдай алады. Қараспан ауылдық округіндегі ауылдар мен елді мекендерде тұратын 14 мыңнан астам тұрғынға медициналық көмек көрсететін болады. Алдағы уақытта да облыста денсаулық сақтау саласын жақсарту бағытында жаңа жобалар жүзеге асырылады.
Айта кетейік, денсаулық сақтау саласында облыс бойынша 219 мекеме халыққа қызмет көрсетеді. Ауылдық жердегі нысандарды жаңғыртуға ерекше назар аударылуда. Бүгінгі таңда 73 нысанға қажеттілік бар. Нақты жоспар түзіп, 3 жылда кезең-кезеңімен шешу жоспарланған. Биылдың өзінде жергілікті бюджет есебінен 34 жаңа ғимараттың мәселесі шешіледі. 3 аудандық орталық ауруханаға күрделі жөндеу жұмыстары жүргізілуде. Алғашқы медициналық көмек сапасын арттыру мақсатында 60 жедел жәрдем көлігі сатып алынды. Медициналық ұйымдарды материалдық-техникалық жарақтандыру деңгейі 84,7 пайызға жетті.
Қараспан ауылында ашылған жаңа дәрігерлік амбулатория – осы саясаттың нақты көрінісі. Жаңа нысан заманауи медициналық құралдармен жабдықталған және ауыл тұрғындарына алғашқы медициналық көмек көрсетуді қамтамасыз етеді. Бұл ауылдық елді мекендердегі медициналық қызметке қолжетімділікті арттырып, тұрғындардың денсаулығын нығайту арқылы еңбекке қабілеттілікті сақтауға мүмкіндік береді. Денсаулығы мықты тұрғындар жергілікті шаруашылыққа, ауыл шаруашылығы мен өндіріс салаларына белсенді түрде қатысып, өңірдің экономикалық өсуіне үлес қосады.
Медициналық инфрақұрылымды жаңарту экономикалық тұрғыдан да тиімділікті қамтамасыз етеді. Жаңа амбулаторияның ашылуы жергілікті экономиканы қолдайтын фактор болып табылады, себебі ауыл тұрғындары медициналық қызметке жергілікті деңгейде қол жеткізетін болғандықтан, қалалар мен облыс орталықтарына бару шығындары азаяды. Сонымен қатар, медициналық жабдықтар мен дәрі-дәрмекке сұраныстың артуы жергілікті жеткізушілер мен кәсіпкерлер үшін жаңа нарықтар ашады. Бұл өз кезегінде экономиканың әртараптануына және инвестиция тартуға мүмкіндік береді.
Сонымен қатар, заманауи дәрігерлік амбулаториялар ғылыми жетістіктер мен жаңа технологияларды енгізу арқылы медициналық қызмет көрсету сапасын арттыруға ықпал етеді. Бұл инновациялық тәсілдер тек медициналық қызмет саласында ғана емес, ауылдық жерлерде жаңа жұмыс орындарын құруға, жергілікті мамандарды даярлауға және кәсіби кадрлардың тұрақтылығын қамтамасыз етуге де септігін тигізеді. Жаңа амбулатория қызметкерлері мен техникалық персоналдың кәсіби өсуі өңірдің білім беру және қызмет көрсету салаларының дамуына да ықпал етеді.
Жалпы алғанда, Ордабасы ауданы, Қараспан ауылындағы жаңа дәрігерлік амбулаторияның ашылуы өңірдің әлеуметтік-экономикалық дамуының кешенді стратегиясына сәйкес келеді. Бұл жоба халықтың денсаулығын нығайту арқылы еңбек өнімділігін арттыруға, экономикалық өзін-өзі қамтамасыз етуге, жаңа жұмыс орындарын құруға және жергілікті кәсіпкерлікті дамытуға ықпал етеді. Заманауи медициналық инфрақұрылымның дамуы Түркістан облысының тұрақты әлеуметтік-экономикалық өсімін қамтамасыз ететін маңызды факторға айналады, сонымен қатар ауылдық жерлерде сапалы медициналық қызметті қамтамасыз ету арқылы халықтың әл-ауқатының артуына үлес қосады.
