Мемлекет басшысы Қазақстан Республикасының ауылдық аумақтарын дамытудың 2023-2027 жылдарға арналған тұжырымдамасын ұсынып, аудан ауылдарды дамытуға тапсырма берген болаиын. Осы бағытта бүгін аудан әкімі Нұрбек Бадырақов жұмыс сапарымен Қараспан ауылдық округіне барды. Ең алдымен Батыр ата ауылына табан тіреп, ауылдағы табиғи газ құбырын тарту жұмыстарымен танысты. Қазір мұнда 244 үй бар. Мердігер мекеме тарапынан жер астынан 19 шақырым болатын газ құбыры тартылған. Биыл Қараспан ауылдық округі бойынша 8 елді мекен табиғи газбен қамтылады деп жоспарланған. Кездесуде аудан әкімі елді мекендерге газ тарту жұмыстары кезінде кемшіліктердің орын алып жатқандығын алға тартып, ретке келтіру үшін сала мамандарына нақты тапсырмалар жүктеді. Сонымен қатар, Қараспан ауылын табиғи газбен және таза ауыз сумен қамту бойынша атқарылып жатқан жұмыстарды көрген аудан әкімі мердігерлерге, ауыл әкімі мен сала мамандарына бірқатар ескертулер жасап, жұмыстың сапасына және уақтылы жүргізілуіне қатаң бақылау жасау керектігін айтты. Қазіргі таңда Қараспандағы төрт елді мекенде ауыз су тарту жұмыстары жүргізілуде. Олар биыл бітіп, тапсырылуы тиіс. Келесі жылы үш нысанға жүргізілсе, нәтижесінде барлық елді мекен таза ауыз сумен қамтылмақ. Бұдан бөлек, аудан басшысы Қараспандағы мәдениет үйінің жай-күйімен танысты. Сондай-ақ, Төреарық елді мекенінде болған аудан әкімі фельдшерлік-акушерлік пунктің құрылысымен танысып, медициналық нысанның мерзімінде пайдалануға берілуін бақылауға алуды тапсырды. Сапар соңында көшпелі мәжіліс өтіп, ауыл әкімі мен тиісті сала басшыларына Қараспан ауылдық округінде өзекті болып отырған мәселелер бойынша тапсырмалар берілді.
ОРДАБАСЫДАҒЫ ЕЛДІ МЕКЕНДЕ ТАБИҒИ ГАЗБЕН ҚАМТУ ЖҰМЫСТАРЫ ЖҮРГІЗІЛУДЕ
Одан бөлек, аудан әкімі Нұрбек Бадырақов жұмыс сапарымен Бадам ауылдық округінде болып, құрылысы жүріп жатқан бірқатар әлеуметтік нысандарды аралады. Атап айтар болсақ, Ордабасы және Дербес ауылдарындағы ауыз су құбырын тарту жұмыстарын көрді. Мысалы, Ордабасы ауылына “Ордабасы тарихи-өлкетану қорығынан” ауыз су желісін жүргізілуде. Қазіргі таңда ұзындығы
2 шқ.болатын траншея қазылып қойылған және қазу жұмыстары жалғасуда. Сондай-ақ диаметрі 110 мм болатын 3,5 шқ полиэтилен құбыр жабыстырылып, жинақталған. Одан бөлек су мұнарасының іргетасы құйылып қойылған. Жалпы, ауыз су желісінің құрылысы аяқталған жағдайда Ордабасы ауылына іргелес жатқан Ұзынбұлақ, Баянбұлақ, Қылышбұлақ және Таңбалы бұлақ ауылдары орталықтандырылған ауыз сумен қамтылатын болады. Аудан әкімі Дербес ауылында құрылысы жүріп жатқан фельдшерлік-акушерлік тіректің жай-күйімен де танысты. Аталған нысан бірер айдан кейін ел игілігіне табысталмақ. Сапар соңында Бадам а/о әкімдігінде аудан әкімінің төрағалығымен көшпелі мәжіліс өтіп, онда ауылдық округте жүргізіліп жатқан жұмыстар сараланды. Жауапты мамандарға, ауыл әкіміне нақты тапсырмалар беріліп, орындау мерзімдері белгіленді.
Бадам ауыл округіне қарасты 4 елді мекенге таза ауыз су тартылуда
Бадам ауылдық округіне қарасты Ордабасы ауылындағы Ұзын бұлақ, Қылыш бұлақ, Баян бұлақ, Таңба бұлақ елді мекендеріне ауыз су құрылысы басталып, құбырлар тартылуда. Қазіргі таңда Мамыр елді мекенінен тартылатын ауыз су ұңғымасы қазылып бітіп, Ордабасы ауылына су құбыры жүргізіліп жатыр. Қазіргі таңда 3.5 шақырымға су құбыры қойылып дәнекерлеу жұмыстары аяқталған. Алдағы уақытта құрылыс жұмыстары толықтай аяқталса 1000 ға тарта тұрғыны бар ауыл таза сумен толықтай қамтылатын болады. Естеріңізге салар болсақ, аудан басшысы Нұрбек Бақтыбайұлы аталған ауыл тұрғындарымен кездесуде осы мәселе көтерілген болатын.
Аудан әкімі мәселені дер кезінде шешу үшін аудандық “Таза су” коммуналдық мемлекеттік мекемесіне тапсырма берген болатын.
Сонымен қатар, аудан әкімі Нұрбек Бадырақов Бадам ауылдық округін аралап, бірқатар әлеуметтік нысандардың жұмысымен танысты. Атап айтар болсақ, Ордабасы, Дербес ауылдарындағы таза ауыз су, Дербес ауылындағы ФАП құрылысын аралап көрді. Тексеру барысында аудан басшысы мердігерлерге құрылыс сапасына баса назар аудару жағын ескертіп, салалық бөлім басшыларына бюджет қаржысының тиімді игерілуін қадағалауды тапсырды. Сондай-ақ, аудан әкімі Бадам ауылдық округі әкімінің 6 айлық есебін тыңдады. Жиын барысында Нұрбек Бақтыбайұлы ауылдағы жұмыспен қамту, инвестиция тарту, салық, шағын және орта бизнесті дамытудағы кемшіліктерді тізбелеп өтіп, ауыл әкімі мен аппаратына, салалық бөлім басшыларына кемшіліктерді тез арада қалпына келтіруді міндеттеді. Әрі жұмысына салғырттық танытқан мекеме қызметкерлеріне сөгіс беру керек деді.
Сонымен қатар, аудан әкімі Нұрбек Бадырақовтың төрағалығымен өткен апталық мәжілісте жылыту маусымы және қатты отынмен қамту мәселесі талқыланды. Аудан басшысы жауапты мекеме басшыларына жылыту маусымына дайындықты сапалы жүргізуді тапсырды. Күн тәртібіне қаралған бірінші мәселе бойынша аудандық тұрғын үй-коммуналдық шаруашлық, жолаушылар көлігі, автомобиль жолдары және тұрғын үй инспекциясы бөлімінің басшысы Ермұхаммед Құралбеков баяндама жасап, аудан көлеміндегі мемлекеттік мекемелердің (мектеп, бала-бақша, аурухана және мәдениет ошақтар мен спорт нысандары) жылыту маусымына дайындығына және жылыжайларды қатты отынмен қамтамасыз ету жағдайына кеңінен тоқталды. Сонымен қатар мәжілісте аудан әкімі ауылшаруашылық, мәдениет, тілдерді дамыту, дене шынықтыру және спорт бөлімінің, адами әлеуетті дамыту мен орталық аурухананың басшыларына жылыту маусымына дайындықты пысықтауды және тиісті жұмыстарды тамыз айының басына дейін бітіруді тапсырды. Кәсіпкерлермен кездесу ұйымдастырып, арнайы құрылған жұмысшы топпен бірге тасымал мәселесін пысықтауды міндеттеді.
-Өткен жылдың қателігі қайталанбауы тиіс. Әсіресе әлеуметтік нысандар, оның ішінде мектептер, денсаулық сақтау мекемелері 100 пайызға дайын болуы керек. Әрбір ғимаратты тексеріп, жұмыс жүргізілсін. Қатты отынмен қамту мәселесі бойынша кемшілік болмауы тиіс. Жұмысқа жауапкершілікпен қарап, жанашырлық танытқандарыңыз дұрыс. Қателіктен сабақ алайық!, – деді аудан басшысы.
Сондай-ақ, Түркістан облысы әкімінің ауданға келген іссапарында және аудан әкімінің ауыл округтерді аралау кезіндегі айтылған ұсыныс-пікірлердің орындалу барысы бойынша аудан әкімі аппаратының басшысы Мейрамбек Ақмұратов баяндама жасап, өз уақытында жауап бермеген бөлімдерге шара көру жөнінде ұсыныс білдірді. Бұдан былай әлеуметтік желіге түскен әрбір өтініштерге өз уақытында нақты жауап берілмесе тиісті бөлім басшысына шара көрілетін болады.
