2023 жылғы 1 қаңтардан бастап Қазақстанда мемлекеттік қолдау шараларын проактивті тағайындау үшін жұмыс режімінде Отбасының цифрлық картасы (ОЦК) іске қосылған болатын.
ОЦК «Smart Data Ukimet» аналитикалық жүйесімен интеграцияланған. Жүйеде мемлекеттік органдардың барлық дерекқоры жинақталған. Онда табыс деңгейі, жылжымалы және жылжымайтын мүліктің болуы, отбасы құрамы, кредиттің болуы және т.б. сияқты әртүрлі ақпарат қамтылған.
Осы орайда, таяуда Әйелдер құқығы мен балалардың қауіпсіздігін қамтамасыз ету бойынша Мәжілістің жалпы отырысында Ажар Сағындықова депутаттық сұрағын Еңбек және халықты әлеуметтік қорғау министрлігі өкіліне жолдаған болатын.
Депутат А.Сағындықова өз сөзінде аталған ведомство қиын ахуалдағы отбасыларды қалай анықтайтынын, оларға қандай қолдау шаралары көзделгенін сұраған еді.
Еңбек және халықты әлеуметтік қорғау министрлігі өкілінің айтуынша, былтыр қабылданған әлеуметтік кодекс шеңберінде жаңашылдық енгізілді, бұл – отбасының цифрлық картасы.
«Отбасының цифрлық картасы қазіргі уақытта басқа да мемлекеттік органдардың цифрлық жүйелерімен біріктірілген, соның арқасында біз барлық Қазақстандағы отбасылардың жағдайы туралы, олардың құрамы туралы ақпаратты алуға мүмкіндігіміз бар. Сонымен қатар былтыр министрліктің халықтың әлеуметтік салауаттығын айқындау бұйрығы қабылданған. Осы әдістеме негізінде Қазақстандағы отбасылар 5 деңгейге бөлініп, оларға сәйкес қандай мемлекеттік шара қолдануды алдын ала біліп отырамыз. Бүгінде практика түрінде қызмет көрсетуге мүмкіндік бар», деді министрлік өкілі.
Еске сала кетейік, ОЦК 2022 жылдың 1 қыркүйегінен бастап қанатқақты режімде іске қосылды. Апробация кезеңінде мемлекеттік қызмет көрсетуге келісім алу үшін барлығы 56,9 мың SMS-хабарлама жіберіліп, жауап берген 12,9 мың азаматқа қолдау шаралары көрсетілді.
