Отбасының цифрлық картасы — бұл әртүрлі мелекеттік органдардың мәліметтерін жинақтау арқылы азаматтардың әлеуметтік әл-ауқаты деңгейін анықтауға мүмкіндік беретін ақпараттық жүйе.
Отбасының цифрлық картасы электрондық хабарлама құралы ретінде қызмет етеді. Яғни, ол азаматтарға қандай мемлекеттік қолдау түрін алуға құқылы екендігі туралы ақпарат жеткізеді.
Сонымен қатар, қазіргі таңда отбасының цифрлық картасы арқылы төлемдердің бірнеше түрін ресімдеуге мүмкіндік бар.
Мемлекет басшысының тапсырмасы бойынша 2022 жылдың 1 қыркүйегінен бастап пилоттық режимде «Отбасының цифрлық картасын» енгізу жұмыстары басталған болатын. Шын мәнінде, карта – бұл азаматтардың әлеуметтік мәртебесіне байланысты кепілдендірілген мемлекеттік қолдаудың қандай да бір түрін алу жөніндегі құқықтары туралы күнделікті электрондық хабарлама болып саналады. Бұл мемлекеттік қызметті жетілдірудің тағы бір тетігі. Яғни, мемлекет ақпараттық жүйе арқылы азаматқа мемлекеттік қолдау түрлерін онлайн алу мүмкіндігін ұсынады.
Бастапқы кезеңде мемлекеттік органдардың ақпараттық жүйелерінің деректері негізінде отбасылардың әл-ауқатын және оларға көрсетілетін қолдау шараларын анықтау бойынша жұмыс жүргізілген. Нәтижесінде, өткен жылғы мәліметтерге сәйкес, цифрлық картаға шамамен 6 млн отбасының, олардың жанұя мүшелерімен қосқанда 19 млн адамның мәліметтер енгізілген екен. Ондағы деректер отбасы мен оның мүшелерінің мәртебесі өзгерген сайын жаңарып отырады. Мемлекеттік қолдау шараларын алуға рұқсат берілген кезде оған СМС-хабарлама жіберіледі. Кейін әлеуметтік жәрдемақы, төлемдер немесе мемлекеттік қолдаудың өзге де түрлерін тағайындау жүзеге асырылады. Ол қаражат азаматтың банк шотына аударылады.
