Отырар ауданындағы индустриалды аймақта инвестициялық жобаларды іске асыру бағытындағы жұмыстар өз деңгейінде атқарылуда. Белгіленген аймақты кеңейту, дамыту жолдарын қарастырып, мамандармен, кәсіпкерлермен кездесу ұдайы өткізіліп отырады. Индустриалды аймақты одан әрі кеңейтіп, кәсіпорындар ашу бағытындағы жұмыстарды жандандыру қолға алынған. Аудандағы индустриалды аймаққа 2025-2027 жылдар аралығында жергілікті және өзге де инвесторларды тарта отырып, өнеркәсіп, өңдеу өнеркәсібі, қайта өңдеу, ауыл шаруашылық тауарларын қайта өңдеу салаларын қамту жоспарланып отыр.
Қазіргі уақытта агроөнеркәсіп саласы бойынша 2 инвестициялық жоба қызығушылық танытуда. Атап айтқанда, жалпы құны 780,0 млн. теңге болатын күріш өңдеу зауытының жобасы. Зауыттың қуаттылығы тәулігіне 50 тонна. Жоба аясында 10 адам жұмыспен қамтылады деп жоспарланған. Ал, екінші жоба – мақтаны терең өңдеу жобасы. Жоба құны 4,1 млрд. теңгені құрайды. Қуаттылығы күніне 120 тонна. Жоба іске асқан жағдайда 30 адам тұрақты жұмыспен қамтылатын болады.
Индустриалды аймақ тоғыз жолдың торабы Шәуілдір және Темір ауылдарының маңында орналасқан. Яғни, темір жол тұйығы, электр желісі, жол, су және кәріз жүйелері секілді қажетті инфрақұрылыммен толық қамтамасыз етілетін болады.
Отырар ауданына облыстан бөлінетін қаржы көлемі жыл сайын қысқарып келеді. Себебі, инвесторлар есебінен өзін-өзі қаржыландыру жұмыстары қарқынды жүруде. Қытай инвесторлары 33 мың гектар жерге мақта егу жұмыстарын бастап кеткен. Облыстан бөлінген трансфер есебінен 2 мәдениет үйі мен 2 ФАП салынып, пайдалануға берілді,-деді облыстық мәслихаттың депутаты Мырзахан Манапов.
Жалпы депутат өз тарапынан 18 депутаттық сауал жолдаған. Түркістан облыстық мәслихат депутаттары ұдайы халықтың талап-тілегі мен ұсынысын ескерусіз қалдырмайды. Алдағы уақытта да күрмеуі қиын мәселелердің оң шешілуіне аянбай қызмет ете бермек. Айта кетейік Отырар ауданынан сайланған облыстық мәслихаттың мандат иесі Мырзахан Манап, жыл басынан бері кезекті 2 қоғамдық қабылдау өткізіп, арыз- шағымын арқалаған бірнеше тұрғынмен жүздесті.
