«Қарты бар елдің-қазынасы бар» деп қазақ халқы бекер айтпаса керек. Иә, халық қариясына қарап бой түзейді. Ақсақалына қарап елі өседі, көргендерін бойына түйіп өседі.
Осындай бастаманы қолға алып, бүгін ауданымызда «Белсенді ұзақ өмір» КММ-нің қызметкерлері және Жамбыл атындағы мектеп-лицейінің 2012 жылғы бітірген түлектерінің демеушілігімен ауданымыздың түрлі салаларда қызмет етіп зейнетке шыққан ардагерлердің басын қосып киелі жер саналған Түркістан қаласына саяхатқа шықты.
Аудандық орталық алаңнан бастау алған шарада аудан басшысы С.Сұлтанханов ардагерлерге жылы лебізін білдіре отырып, демеушілік танытқан түлектерге алғысын жеткізсе, аудандық ардагерлер кеңесінің төрағасы М.Өксікбаев сапарға шыққалы отырған ардагерлерге ақ жол тіледі. Одан әрі мерекелік концертке ұласып, ардагерлер саяхатқа жол тартты.
Саяхатқа жалпы саны 40-қа жуық ардагер шықты. Тарихи-тағлымы мол киелі мекеннің жердің қыртысындай қатпарланған тарихын естіп, Қожа Ахмет Ясауи кесенелеріне барды. Сонымен қатар Түркістан қаласындағы Әзірет Сұлтан мәдени қорығы мен Керуен сарай туристік кешендеріне экскурсия ұйымдастырылды.
Әркез қариясын сыйлап, алдынан кесе көлденең өтпеген қазақ елі біршама істерде де қариялармен санасып, ақылдасатыны баршаға аян. Олардың орта буын мен жас ұрпаққа берері көп және таусылмасын. Сондықтан үлкенімізді сыйлап, ардақты ардагерлерді ұлықтап жүргеніміз өзімізге де, өзге де үлгі болмақ.
