«AMANAT» партиясы Түркістан облыстық филиалы жанындағы Өңірлік даму жөніндегі кеңестің көшпелі отырысы Шардара ауданында өтті. Түркістан облысының әлеуметтік-экономикалық даму барысы мен партияның сайлауалды бағдарламасын іске асыру жолдары «AMANAT» партиясы Түркістан облыстық филиалы жанындағы Өңірлік даму жөніндегі кеңестің кезекті көшпелі отырысында жан-жақты талқыланды.
Жиын Шардара аудандық партия филиалының мәжіліс залында өтіп, оған «AMANAT» партиясы Түркістан облыстық филиалының төрағасы Алтынсары Үмбетәлиев, кеңес төрағасы, облыстық мәслихат депутаты Бахытжан Серманизов, Шардара ауданының әкімі Арман Қарсыбаев, Келес ауданының әкімі Жәнібек Ағыбаев, сондай-ақ кеңес мүшелері мен жауапты сала басшылары қатысты.
Жиынды ашқан Алтынсары Дүйсенбекұлы Мемлекет басшысы Қасым-Жомарт Тоқаев жүргізіп отырған реформалардың негізінде өңірлерді теңгерімді дамыту – басты басымдықтардың бірі екенін атап өтті. Оның айтуынша, партияның 2023–2027 жылдарға арналған сайлауалды бағдарламасы – халықтың әл-ауқатын арттыруға, әлеуметтік әділдік орнатуға және аймақтық дамудағы теңсіздіктерді жоюға бағытталған маңызды стратегиялық құжат.
«Бағдарламаны нақты іске асыру мақсатында Жол картасы бекітіліп, онда көрсетілген міндеттердің орындалуына партиядан сайланған депутаттар мен жергілікті атқарушы органдар бірлесе жауапты. Ал оның орындалуын бақылау – облыстық филиал жанынан құрылған тоғыз кеңестің тікелей міндеті», – деді Алтынсары Үмбетәлиев.
Осы мақсатта кеңес жұмысының тиімділігін арттыру үшін отырыстарды облыстың түрлі аудандарында көшпелі түрде өткізу тәжірибесі енгізілген. Бұл жергілікті жерлердегі нақты ахуалды көзбен көріп, шешім қабылдауда жүйелілік орнатуға септігін тигізеді.
Жиын барысында Шардара ауданының әкімі Арман Қарсыбаев 2023 жылы атқарылған жұмыстар мен ағымдағы жылы жоспарланған жобалар туралы кең көлемді баяндама жасады. Оның айтуынша, партияның сайлауалды бағдарламасына сәйкес Шардара ауданы бойынша 4 бағыт пен 63 индикаторлық көрсеткіш айқындалып, өткен жылы осы көрсеткіштердің 59-ы орындалған.
Атқарылған негізгі нәтижелерге тоқталсақ, ауыл шаруашылығын жаңғырту аясында 109 техника жаңарту жоспарланса, нақты 133 техника жаңартылып, жоспар артығымен орындалған, «Өңірлік жұмыспен қамту картасы» шеңберінде 4026 жұмыс орны ашу көзделгенімен, 4953 жаңа жұмыс орны құрылып, жоспар 123 пайызғы орындалған. Кәсіпкерлікті қолдау бағытында бекітілген 2 инвестициялық жобаның орнына 5 жоба жүзеге асырылған.
Сонымен қатар, аудан әкімі газдандыру, тұрғын үй құрылысы, үш ауысымды және апатты мектептер мәселесінің шешілгенін айтты. Дегенмен, кейбір бағыттарда қиындықтар бар екенін жасырмады. Атап айтқанда, ауыз су мәселесі толық шешілмеген. Кейбір ауылдарда жеңілдетілген несиелерге қолжетімділік төмен, учаскелік полиция пункттерінің кейбір елді мекендерде мүлде салынбауы секілді түйткілдер бар екенін айтты.
Келес ауданының әкімі Жәнібек Ағыбаев өз баяндамасында өңірдегі экономикалық өсім мен бағдарлама индикаторларының орындалу барысына тоқталды. 2023 жылы ауданның жалпы өңірлік өнім көлемі 107,4 млрд теңгені құрап, өзіндік кірістер 5,8 млрд теңгеге жеткен. Бұл көрсеткіш жоспардың 104,2%-ына тең. Келес ауданында партияның Жол картасы аясында 4 негізгі бағыт бойынша 64 іс-шара жоспарланған. 2023 жылы оның 50-і бекітіліп, 41-і толығымен орындалған. Биыл тағы 45 іс-шара жүзеге асырылмақ. Әсіресе, «Өмір сапасын арттыру» бағыты бойынша жұмыстар толықтай орындалғаны айтылды.
Алайда шешімін таппаған мәселелер де бар. Аудан көлемінде жергілікті маңызы бар автомобиль жолдарының жақсы және қанағаттанарлық үлесін 99,2%-ға жеткізу, өрт сөндіру деполарын салу, халық табысын арттыру бағытында кедергілер бары айтылды.
Жиын барысында кеңес мүшелері тарапынан баяндамашыларға нақты сұрақтар қойылып, жергілікті әкімдерден жауаптар алынды. Құрылыс нысандарының сапасы мен мерзімінде аяқталуының қадағалануы, аудандарда жұмыссыздықты азайту бойынша жүзеге асырылып жатқан жобалар, ауыз су, жол және электр энергиясымен қамту бойынша қандай мәселелер бар және оларды шешу үшін не істеліп жатыр, деген сынды сауалдар қойылды.
Кеңес отырысы өңірлік дамуға жауапты барлық тараптардың есебін тыңдап, нақты мәселелерді саралауға және олардың шешу жолдарын бірге қарастыруға үлкен мүмкіндік берді. «AMANAT» партиясы өңірлердегі әрбір мәселені назардан тыс қалдырмай, елдің әлеуметтік-экономикалық дамуын нақты іспен қолдап келеді. Шардарадағы бұл отырыс — партияның халықпен етене жұмыс істеп, ел мүддесі жолында жүйелі жоспарлар жасап отырғанының жарқын дәлелі.
«AMANAT» партиясы Түркістан облыстық филиалының баспасөз қызметі
