Сапалы медициналық қызметтер толық көлемде тұратын жеріне қарамастан Қазақстанның барлық азаматтарына қолжетімді болуы тиіс. Бұл туралы Президент Қасым-Жомарт Тоқаев Ақтөбе облысына сапары кезінде айтты.
«Медициналық көмектің қолжетімділігі мен сапасын арттыру міндеттерін дәрігерлік мамандықтың мәртебесі мен беделін арттыру мәселесін шешпей жүзеге асыру мүмкін емес. 2019 жылдың 1 маусымынан бастап бюджеттік сала қызметкерлерінің жекелеген санаттарына, соның ішінде медиктерге де еңбекақы 30%-ға дейін өседі», — деді Президент.
Тағы бір маңызды міндет — «жеңіл қолжетімділік» шеңберінде алғашқы медициналық-санитарлық көмек көрсету жүйесін кеңейту.
Сонымен қатар, Қасым-Жомарт Тоқаевтың пікірінше, Денсаулық сақтау жүйесі мен білім беру жүйесінің маңызды басымдығы — дәрігерлердің дайындық сапасы.
«Салалық министрлік, медициналық ғылым және қоғам сандық медицинаны дамытуға баса назар аудара отырып, салада жаңа жетістіктерді іздестіру және енгізу бойынша жұмыс істеуі тиіс. Денсаулық сақтауды цифрландыру — медицина прогресінің магистральды тренді. Алайда, оның даму қарқыны жақсы. Бұл МӘМС енгізу мерзімін ауыстыру себептерінің бірі болып табылады. Осы күнге дейін Деректер қоры арасында интеграция жоқ. Әрбір емхана мен аурухана өз мәліметтерінің жинақталуын жергілікті жүргізеді. Цифрландыру міндеті-бұл ұйымдар арасындағы мәліметтермен жедел алмасу, үдерісті автоматтандыру, медицина қызметкерін тән емес функциялардан босату. Іс жүзінде біз мұны әлі алған жоқпыз», — деді президент.
Қазір тіршіліктің цифрланбаған саласы кемде-кем. Бірақ бұл цифрлану үдерісінде толыққанды табысты жұмыс істедік дегенді білдірмейді. Цифрлану – бір бөлек, ал оның сапасы – мүлде бөлек әңгіме. Әсіресе, денсаулық сақтау саласының цифрлық жүйесі сөз болғанда кібіртіктей береміз. Қазірге дейін ұсынылған мобилді қосымшалары сәтті жұмыс істей алған жоқ. Халық тарапынан ризашылықтан гөрі реніш басым.
Денсаулық сақтау министрлігі осындай олқылықтардың орнын толтыру мақсатында Цифрлық даму министрлігімен бірлесе отырып пайдалы цифрлық жобаларды жүзеге асырмақ. Жақында Денсаулық сақтау министрі Ажар Ғиният пен Цифрлық даму, инновациялар және аэроғарыш өнеркәсібі министрі Бағдат Мусин Мемлекет басшысының:
- Телемедицинаны дамыту,
- Бизнес-процестерді реинжинирингтеу,
- Деректерді жинаудың заманауи технологияларын енгізу,
- Медициналық бейнелерді сақтауды орталықтандыру
- Жасанды интеллекті енгізу
жөніндегі тапсырмаларын іске асыру мәселесін талқылады.
«Қасым-Жомарт Кемелұлы өз Жолдауында екі жыл ішінде Қазақстанның 650 ауылында фельдшерлік-акушерлік пункттер құрылатынын атап өтті. Сонымен қатар, Президент шалғай аудандардың тұрғындары білікті медициналық көмекке қол жеткізе алуы үшін телемедицинаны дамыту мәселесін басты назарға алуды тапсырған болатын. Ажар Ғиниятпен кездесу барысында телемедицинаның толық функционалын көрсетуге бағытталған пилоттық аймақтарды анықтаймыз деп уағдаластық. Біз бірнеше фельдшерлік-акушерлік пунктерді пациенттердің деректерін тікелей облыстық ауруханаға ұсынатындай етіп жабдықтаймыз. Дәрігерлер осы арқылы пациентке көмек көрсету туралы шешімді тез арада қабылдай алады. Осы ретте, Денсаулық сақтау министрлігі онлайн-қызмет көрсетуді ынталандыру үшін бірқатар құжаттарға қажетті өзгерістер мен толықтырулар енгізеді», деді министр.
Оның айтуынша, соңғы жылдары денсаулық сақтау жүйесінде жасанды интеллектті енгізу мәселесі күннен-күнге өзекті тақырыпқа айналып келе жатыр. Бұл ретте Бағдат Мусин жасанды интеллектті сертификаттау бойынша процестерді белгілі бір аурулармен күресуге көмектесетін құрал ретінде бастау керек деген пікір білдіреді.
«Бірақ бұл үшін алдымен ақпараттың бірыңғай дерекқорын, медициналық бейнелерді сақтау жүйесін құру керек, өйткені әзірге бұл жүйе тиянақталмаған. Жасанды интеллекттің жұмыс принципі – үнемі жетіле түсуінде, яғни ол неғұрлым көп мәліметтер алса, соғұрлым нәтижеге бейімделетін болады. Денсаулық сақтау саласын толық цифрландыруға тоқталатын болсақ, онда медициналық ұйымдарды қағазбастылықтан арылту жұмыстарын жеделдету керекпіз. Біз медициналық мекемелердегі құжат айналымын түрлі қажетсіз формалардан арылту және деректерді қалыптастыру жұмыстарын өзектендіру бойынша бірлесе жұмыс істеуге уағдаластық. Сондай-ақ, Денсаулық сақтау министрлігінің ақпараттық жүйелері басқа мемлекеттік органдардың, мысалы, Прокуратураның, Еңбек министрлігінің, Әділет министрлігінің және тағы да басқа ведомстволардың ақпраттық жүйелерімен интеграциялануы тиіс. Біз Цифрлық министрлік ретінде Денсаулық сақтау министрлігінің бастамаларын қолдауға дайынбыз. Денсаулық сақтау бағыты цифрландыру тұрғысынан алғанда ең озық салалардың бірі болуы тиіс», деп атап өтті Бағдат Мусин.
