Мемлекет басшысы Қасым-Жомарт Тоқаев Түркістан облысына жұмыс сапары аясында өңір жұртшылығымен кездесу өткізіп, Түркістанның туризм саласындағы әлеуеті жоғары екенін атап өтіп, туризм саласына ден қою керек екендігін айтты.
«Түркістан – бәріміздің мақтанышымыз, екі дүние есігі, ер түріктің бесігі атанған бүкіл әлемге танымал қасиетті жер. Осы киелі шаһардың төл тарихымызда айрықша орны бар. Түркістан төріндегі Қожа Ахмет Ясауи кесенесі – руханиятымыздың мызғымас діңгегі. Сондықтан Түркістанға, жалпы, осы облысқа ерекше мән беруіміз керек. Бұл, ең алдымен, Үкіметіміздің басты міндеті. Біз киелі шаһарды рухани және тарихи елордамыз десек, дұрыс пайым болатынына күмәнім жоқ. Сондықтан Үкімет таяу арада Түркістан қаласына осындай мәртебе беру мәселесіне қатысты лайықты шешім қабылдайды деп ойлаймын. Қастерлі шаһар көне заманнан бері ұлттың ұясы, қазақтың қара шаңырағы болып келеді. Түркістан осы мәртебелі міндетін қазір де абыроймен атқарып отыр.», деді Қ. Тоқаев.
Сонымен қатар туризм саласына көбірек инвестиция тартуды тапсырды.
«Кәсіпкерлер туризмнің болашағы зор екенін көруі керек. Сол үшін қажетті жағдайды жасаған жөн. Осы салаға салынған жеке инвестицияның көлемі, іштен және сырттан келген туристердің саны неғұрлым көп болса, жұмыстың нәтижесі де соғұрлым тиімді болмақ», деп атап өтті Президент.
Түркістан облысында туристік саланы дамыту өңірлердің дамуында жаңа серпілісті қалыптастыруға, халықтың әлеуметтік-мәдени белсенділігін ынталандыруға, бірегей табиғи орындар мен тарихи ескерткіштерді ел ішінде және халықаралық деңгейде танымал етуге бағдарланған кешенді мемлекеттік саясаттың перспективалы бағыттарының бірі болып табылады. 2019-2025 жылдарға арналған мемлекеттік бағдарламасына сәйкес Түркістан Қазақстанның ТОП-10 туризмді дамытудың негізгі туристік дестинацияның қатарына қосылды. Түркістан облысы тарихи және мәдени мұраға бай және ашық аспан астындағы өзіндік мұражай болып табылады. Облыс аумағында 1754 тарих және мәдениет ескерткіші, оның ішінде 1 халықаралық маңызы бар объект (Қ.а. Ясауи кесенесі), 31 Республикалық маңызы бар ескерткіш, 421 жергілікті маңызы бар ескерткіш және 1301 объект алдын ала тізімде бар.
Сондай-ақ, облыста 225 орналастыру орындары (қонақ үйлер, хостелдер, демалыс аймақтары, балалар лагерлері) және 68 санаториялық-курорттық ұйымдар жұмыс істейді. Бұдан басқа, облыс аумағында ЮНЕСКО биосфералық объектілерінің тізіліміне енгізілген 4 Ерекше қорғалатын табиғи объект – «Ақсу-Жабағылы» және «Қаратау» қорықтары, сондай-ақ «Сайрам-Өгем» ұлттық табиғи паркі және “Сырдария-Түркістан”өңірлік табиғи паркі орналасқан.
Айта кетсек, өткен жылдың 9 ай қорытындысы бойынша туристер саны 196 136 адамды құрады, сондай-ақ «Әзірет Сұлтан» мемлекеттік тарихи-мәдени қорық-музейіне бір күндік келушілер саны 805 383 адамды құрады.
Түркістан облысы Республиканың сауықтыру туризмі дамыған өңірлерінің бірі болып табылады. Қазіргі уақытта облыс аумағында 68 емдеу-сауықтыру орны жұмыс істейді. Емдеу-сауықтыру ұйымдарының нөмірлік қоры 6271 төсек-орынды құрайды. Айта кету керек, Түркістан облысындағы емдеу-сауықтыру туризмі әлеуетінің басым бөлігі Сарыағаш ауданы Көктерек ауылында орналасқан. Облыс аумағындағы 68 емдеу-сауықтыру орнының 53-і немесе
77,9% көктерек кентінде жұмыс істейді. Жыл сайын елді мекендегі емдеу-сауықтыру ұйымдарының саны өсуде. 2 Сонымен қатар, жыл соңына дейін 2 емдеу-сауықтыру кешенін пайдалануға беру жоспарлануда.
Бүгінде жоғарғы көрсеткішке қол жеткізу мақсатында Түркістан облысының әкімдігі жергілікті кәсіпкерлермен және әлеуетті инвесторлармен жүйелі жұмыс жүргізуде. Қазіргі уақытта облыс аумағында іске асырылатын туристік инвестициялық жобалар пулы әзірленді. Облыс аумағындағы жобалар пулына сәйкес 2023-2024 жылдарға жалпы сомасы 41,691 млрд. теңгеге 18 туристік инвестициялық жобалар құрылысы жоспарлануда. Атап айтқанда, 30 бөлмелі қонақ үй, 100 бөлмелі қонақ үй, Medina Palace” қонақ үйі, “Отау” ойын-сауық орталығы, Фитнес-клуб, мұз айдыны, теннис орталығы, “Turkistan Mall”ойын-сауық орталығы сияқты жобалар іске асырылуда.
Түркістан облысында ағымдағы жылдың қорытындысы бойынша
19 туристік нысан (“Platinum”, “Khan palace”, “Almaty city” Қонақ үйлері, “Шаға” туристік – рекреациялық орталығы, туристерге арналған Сапар орталығы және т. б.) пайдалануға берілді. Жалпы, жаңа жұмыс орындары – 291 бірлікті құрады.
Түркістан облысының әкімдігі облыс аумағында жүзеге асырылып жатқан инфрақұрылымдық жобалар пулын әзірледі. Пулға жалпы сомасы 34,7 млрд.теңгеге 10 жоба енгізілді. Инфрақұрылымдық жобалардың аяқталуы 2023-2024 жылдарға жоспарланған. Түркістан облысының әкімдігі ағымдағы жылдың тамыз айында туристік объектілердің аумағындағы және оларға баратын жолдағы санитариялық-гигиеналық тораптарға түгендеу жүргізді. Облыс бойынша барлығы 88 санитарлық-гигиеналық тораптар орналасқан, оның ішінде 51 СГТ облыс аудандары мен қалалары әкімдіктерінің балансында. Бүгінгі таңда ұлттық стандарттарға сәйкес келетін, Мемлекеттік мекемелердің балансында тұрған 33 СГТ заңды және жеке тұлғаларға (ЖК) сенімгерлік басқаруға беру бойынша жұмыс жүргізілуде.
Сонымен қатар, Түркістан қаласына келетін туристердің санын арттыру мақсатында ағымдағы жылдың 19-23 наурыз аралығында Ұлыстың ұлы күні Наурыз мейрамы қарсаңында «Керуен сарай» туристік кешенінің субұрқағы алаңында елімізге танымал және облысымыздың әншілерінің қатысуымен «Nauryz open air» атты концерттік бағдарлама ұйымдастырылып, аталған іс-шараға Айқын Толепберген, Дастан Оразбеков, Жанболат пен Жазира, Кенжебек Жанабылов, Rise-Abudi, FM тобы секілді әншілердің қатысуымен шоу-концерт өткізілді.
Сонымен қатар, Түркістан облысының сыртқы және ішкі туризмін дәріптеуге, шетелдіктер үшін өңірдің тарихи – мәдени құныдылықтарын насихаттауға, Түркі тілдес мемлекеттер арасындағы қарым – қатынастарды, мәдени байланыстарды нығайту мақсатында Түркістан қаласында «Түркістан – Түркі әлемінің рухани астанасы» атты халықаралық туризм додасы» жобасы іске асырылды. Жобағы түркітілдес 5 мемлекеттің шығармашылық өкілдері қатысты.
Атап айтқанда, Қырғызстан Республикасының еңбек сіңірген әртісі – Мирбек Атабеков, өзбекстандық танымал актриса, әнші әрі тележүргізуші – Ситора Фармонова, атақты әншілер – Амиль Мамедов (Әзірбайжан),
Серен Узун (Түркия) және қазақтың ұлттық өнерін насихаттап жүрген азамат Алексей Лодочников қатысты. Жобаның қорытындысымен «Керуен – Сарай» туристік кешенінде әншілердің қатысуымен галаконцерт ұйымдастырылып өткізілді. Жалпы шараға қатысушылар саны шамамен 9000 жуық адамды құрады.
Өз кезегінде, арнайы туристік нысандарын қамтитын 5 туристік маршрут әзірленіп turkistantravel.com туристік порталына және туроператорлар мен гид-экскурсоводтарға сондай-ақ Туристерге қызмет көрсету орталығының «ресепшн» бөліміне қолданысқа берілді.
Сондай – ақ, еліміздің көрнекті орындарына баруға ынталандыру арқылы ішкі туризмді насихаттау мақсатында ҚР Мәдениет және спорт министрлігімен ұйымдастырылып отырған «Neo Nomad – 20» акциясы аясында туристер тізімдегі орындарға барып, фотосуреттерін #NeoNomad20 тегімен әлеуметтік желіде орналастыру үшін Түркістан облысының Сауран қалашығында арнайы Фото жиектеме орнатылды.
Туристік маусымның ашылуына 01-05 мамыр аралығында Түркі елдерінің туристік компаниялары үшін Түркістан облысының дестинациялары бойынша ақпараттық туры, 18-20 мамыр аралығында облыс делегациясының “Qazaqstan Life Fest” халықаралық көрмесіне қатысуы, 20-21 мамыр күндері Түркі әлемі дизайнерлерінің ашық күнін қоса алғанда, халықаралық этно подиумы, 24-28 мамыр аралығында «Түркістанды көргім келеді» шоу бағдарламасы ұйымдастырылады.
Сонымен қатар, 1 маусым балаларды қорғау күніне орай, «Туристік отбасы» балалар туризіміне арналған іс шара, 3 маусым «Шаға» жағажай маусымының ашылу апталығы, 19-23 маусым аралығында Орналастыру және тамақтандыру кәсіпорындарының басшылары мен басқару қызметкерлеріне оқыту семинарын өткізу жоспарланған. 8 шілде «Airsoft» страйкбол чемпионаты, 22-23 шілде «Түркістан таулары» белсенді экологиялық туризм іс-шарасы өткізілмек. 7-14 тамыз Жергілікті қоғамдастықтарда этнотуризмді дамыту үшін қонақүйлер секторында конкурстарды ұйымдастыру, 19 тамыз «QAUYN FEST» фестивалін ұйымдастыру жоспарланған.
4-7 қыркүйек Түркістан облысының туристік өнімін Өзбекстанның негізгі аймақтарында ілгерілету іс-шарасы, 13-15 қыркүйек Оқыту семинарларын ұйымдастыру, 27-28 қыркүйек Сауықтыру туризмі бойынша конфнһеренция ұйымдастыру көзделген. 3-5 қазан – Париж қаласында өтетін халықаралық көрмеге қатысу, 17-20 қазан – Түркістан облысының туристік өнімін Түркияның негізгі аймақтарында ілгерілету, 26-29 қазан – Осака қаласында өтетін OSAKA TOURISM FAIR халықаралық туристік көрмесіне қатысу шаралары өткізілмек.
Бұдан бөлек, 15-47 қараша – Ташкент қаласында өтетін халықаралық туристік көрмеге қатысу, 20-22 қараша – QATAR TRAVEL MARKET халықаралық туристік көрмеге қатысу көзделген.
Түркістанда бұған дейін де ауқымды іс-шаралар өткізілген және бұл іс-шаралар өңіріміздің туристік әлеуетін арттырады және бұдан кейін де жыл сайын өтіп тұратын ауқымды іс-шаралар қатарын толықтыру жоспарланған. Жыл сайынғы іс-шаралар экономиканың түрлі салаларында мультипликативті әсер береді, өңірдің туристік әлеуетін арттырады және жаңа жұмыс орындарын құруға ықпал етпек.
